సాలూరులో వరద ముంపు ప్రాంతాలను పరిశీలించిన మంత్రి సంధ్యారాణి

xPress24, Salur, October 29, పార్వతీపురం మన్యం జిల్లా, అక్టోబర్ 29: అర్నబ్ తుపాను ప్రభావంతో పార్వతీపురం మన్యం జిల్లా సాలూరు పట్టణంలోని వేగావతి నదికి వరద ఉధృతి పెరిగింది. దీంతో పట్టణంలోని తొమ్మిదో వార్డు కొంకివీధిలోకి వరద నీరు చేరి పలు ఇళ్లు ముంపునకు గురయ్యాయి. ఈ నేపథ్యంలో రాష్ట్ర మహిళా, శిశు సంక్షేమం, గిరిజన సంక్షేమ శాఖ మంత్రి సంధ్యారాణి గురువారం ముంపు ప్రాంతాన్ని పరిశీలించి, బాధిత కుటుంబాలను పరామర్శించారు. భారీ వర్షాల కారణంగా ఇళ్లలోకి వరద నీరు చేరడంతో గృహోపకరణాలు తడిసి పాడయ్యాయని, రాత్రంతా నిద్రలేకుండా గడిపామని స్థానికులు మంత్రి ఎదుట ఆవేదన వ్యక్తం చేశారు. వరదల కారణంగా తనకు చెందిన పది పందులు కొట్టుకుపోయాయని బాధితుడు పాపారావు మంత్రికి వివరించారు. బాధితుల సమస్యలను అడిగి తెలుసుకున్న మంత్రి సంధ్యారాణి, వరదల వల్ల జరిగిన నష్టాన్ని సమగ్రంగా అంచనా వేయాలని అధికారులను ఆదేశించారు. నష్టపోయిన బాధితులకు నిబంధనల ప్రకారం పరిహారం అందేలా అవసరమైన చర్యలు తీసుకుంటామని హామీ ఇచ్చారు. బాధిత కుటుంబాలకు ప్రభుత్వం అండగా ఉంటుందని భరోసా కల్పించారు.