హైదరాబాద్ 'భారత్ సమ్మిట్'కు రాహుల్ గాంధీకి ఆహ్వానం.. టీపీసీసీ అధ్యక్షుడు మహేశ్ కుమార్ గౌడ్ భేటీ

xPress24, Hyderabad, November 10, దిల్లీ పర్యటనలో ఉన్న తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు బి. మహేశ్ కుమార్ గౌడ్ కాంగ్రెస్ అగ్రనేత రాహుల్ గాంధీతో సమావేశమయ్యారు. ఈనెల 12 నుంచి 14 వరకు హైదరాబాద్‌లో నిర్వహించనున్న ప్రతిష్ఠాత్మక 'భారత్ సమ్మిట్' సదస్సుకు ముఖ్య అతిథిగా హాజరుకావాల్సిందిగా రాహుల్ గాంధీకి ఆహ్వాన పత్రిక అందజేశారు. మూడు రోజుల పాటు జరిగే ఈ సదస్సులో ఏదైనా ఒకరోజు పాల్గొనేందుకు రాహుల్ గాంధీ సూత్రప్రాయంగా సానుకూలత వ్యక్తం చేసినట్లు తెలుస్తోంది. 100 దేశాల నుంచి 450 మంది ప్రతినిధులు.. ఆర్థిక, అంతర్జాతీయ సంబంధాలపై చర్చ ప్రపంచ దేశాలతో భారతదేశ ద్వైపాక్షిక, వాణిజ్య సంబంధాలను బలోపేతం చేసే లక్ష్యంతో హైదరాబాద్ వేదికగా ఈ భారత్ సమ్మిట్‌ను నిర్వహిస్తున్నారు. ఈ అంతర్జాతీయ సదస్సులో 100 దేశాలకు చెందిన దాదాపు 450 మంది విదేశీ ప్రతినిధులు, కేంద్ర మంత్రులు, పార్లమెంట్ సభ్యులు పాల్గొంటారు. ప్రపంచ దేశాల మధ్య సమన్వయం, అంతర్జాతీయ భాగస్వామ్యాలు, ఆర్థిక పురోగతి అంశాలపై సదస్సులో విస్తృతంగా చర్చలు జరగనున్నాయి.