హైలో ఓపెన్‌లో భారత జోరు: సింధు, లక్ష్యసేన్‌ల విజయాలు

xPress24, Delhi, November 2, జర్మనీలోని సార్‌బ్రుకెన్ వేదికగా జరిగిన 'హైలో ఓపెన్ 2026' బ్యాడ్మింటన్ టోర్నమెంట్‌లో భారత స్టార్ షట్లర్లు పీవీ సింధు, లక్ష్యసేన్ సరికొత్త చరిత్ర సృష్టించారు. పురుషుల, మహిళల సింగిల్స్ విభాగాల్లో ఇద్దరూ విజేతలుగా నిలిచి భారత్‌కు డబుల్ టైటిల్ ఘనతను అందించారు. ఆదివారం రాత్రి జరిగిన మహిళల సింగిల్స్ ఫైనల్లో పీవీ సింధు పూర్తి ఆధిపత్యం కనబరుస్తూ డెన్మార్క్ క్రీడాకారిణి లైన్ కెర్స్‌ఫెల్ట్‌పై 21-12, 21-14 తేడాతో వరుస గేట్లలో ఘన విజయం సాధించారు. ఈ విజయంతో హైలో ఓపెన్ మహిళల సింగిల్స్ టైటిల్ గెలిచిన తొలి భారతీయ మహిళా క్రీడాకారిణిగా సింధు సరికొత్త రికార్డు నెలకొల్పారు. గత జూలైలో గెలిచిన జపాన్ ఓపెన్ తర్వాత ఆమెకు ఇదే తొలి బీడబ్ల్యూఎఫ్ టైటిల్ కావడం విశేషం. జోనాథన్ క్రిస్టీపై లక్ష్యసేన్ సంచలన విజయం మరోవైపు పురుషుల సింగిల్స్ ఫైనల్లో భారత యువ కెరటం లక్ష్యసేన్ అద్భుత ప్రదర్శన కనబరిచారు. డిఫెండింగ్ ఛాంపియన్, ఇండోనేషియా స్టార్ షట్లర్ జోనాథన్ క్రిస్టీని 21-17, 21-10 తేడాతో చిత్తు చేసి విజేతగా నిలిచారు. లక్ష్యసేన్ ఈ ఏడాది గెలుచుకున్న తొలి బీడబ్ల్యూఎఫ్ టైటిల్ ఇదే కాగా, కెరీర్‌లో ఆయనకు ఇది రెండో హైలో ఓపెన్ కిరీటం. ఈ అద్భుత విజయంతో హైలో ఓపెన్ టోర్నీ చరిత్రలో రెండు పురుషుల సింగిల్స్ టైటిళ్లు సాధించిన ఏకైక భారత బ్యాడ్మింటన్ ప్లేయర్‌గా లక్ష్యసేన్ ఘనత వహించారు.