2047 నాటికి తెలంగాణ 3 ట్రిలియన్ డాలర్ల ఎకానమీ: సీఎం రేవంత్

xPress24, Hyderabad, October 14, 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా మారుస్తామని ముఖ్యమంత్రి రేవంత్ రెడ్డి స్పష్టం చేశారు. హైటెక్స్‌లో సమాఖ్య ఛాంబర్ ఆఫ్ కామర్స్ ఆధ్వర్యంలో ఏర్పాటు చేసిన ‘సమాఖ్య-2026’ సదస్సును ఆయన లాంఛనంగా ప్రారంభించారు. ఈ సదస్సు రెండు రోజుల పాటు జరగనుంది. ఈ కార్యక్రమంలో కేంద్రమంత్రులు బి.ఎల్. వర్మ, భగీరథ చౌదరి, కమలేశ్ పాశ్వాన్, భూపతిరాజు శ్రీనివాసవర్మ, ఎంపీ డాక్టర్ కె. లక్ష్మణ్, వేం నరేందర్ రెడ్డితో పాటు దేశ, విదేశాల నుంచి 3,000 మందికి పైగా వ్యాపారవేత్తలు, ప్రతినిధులు పాల్గొన్నారు. జీడీపీలో తెలంగాణ వాటా పెంపే ధ్యేయం సదస్సులో సీఎం మాట్లాడుతూ.. దేశ జనాభాలో రాష్ట్ర వాటా 2.5 శాతమే అయినప్పటికీ, జాతీయ జీడీపీకి తెలంగాణ 5 శాతం రికార్డు సహకారాన్ని అందిస్తోందని తెలిపారు. 2047 నాటికి దేశ జీడీపీలో రాష్ట్ర వాటాను 10 శాతానికి పెంచడమే ప్రభుత్వ ప్రధాన లక్ష్యమని చెప్పారు. మహిళల భాగస్వామ్యం ఉంటేనే ఆర్థిక వ్యవస్థ మరింత బలపడుతుందని, అందుకే మహిళలను విజయవంతమైన వ్యాపారవేత్తలుగా తీర్చిదిద్దడమే లక్ష్యంగా ప్రభుత్వం పనిచేస్తోందని వెల్లడించారు. టోక్యో, సింగపూర్‌లతో పోటీగా హైదరాబాద్ అభివృద్ధి హైదరాబాద్‌ను టోక్యో, సింగపూర్‌లకు పోటీగా అభివృద్ధి చేస్తున్నామని సీఎం తెలిపారు. కొత్త పెట్టుబడుల ద్వారా యువతకు మెరుగైన ఉపాధి అవకాశాలు కల్పిస్తామన్నారు. బహుళజాతి కంపెనీలకు సేవలందించే స్థాయి నుంచి సొంతంగా సంస్థలను స్థాపించే స్థాయికి స్థానిక యువత ఎదగాలని ఆకాంక్షించారు. స్కైరూట్ తరహాలో తెలంగాణ నుంచి మరిన్ని స్టార్టప్ కంపెనీలు పుట్టుకురావాలని పిలుపునిచ్చారు. ఉత్తమ ప్రణాళికలు, విధానాలతో వచ్చే ఏ పెట్టుబడిదారుడికైనా పూర్తి ప్రోత్సాహం అందిస్తామని సీఎం భరోసా ఇచ్చారు.