అల్లూరి సీతారామరాజు జిల్లా ప్రజా పరిషత్‌ కార్యకలాపాలు ప్రారంభం

xPress24, Paderu, September 25, పాడేరు, సెప్టెంబర్‌ 25, 2026: అల్లూరి సీతారామరాజు జిల్లా ప్రజా పరిషత్‌ (ZPP–ASR) కార్యకలాపాలు శుక్రవారం నుంచి అధికారికంగా ప్రారంభమయ్యాయి. పాడేరు ఎంపీడీవో కార్యాలయంలో నిర్వహించిన ప్రారంభ కార్యక్రమానికి విశాఖపట్నం జిల్లా ప్రజా పరిషత్‌ డిప్యూటీ చీఫ్‌ ఎగ్జిక్యూటివ్‌ ఆఫీసర్‌ (డీవై.సీఈవో) కె. రాజ్‌కుమార్‌ అధ్యక్షత వహించారు. ఆంధ్రప్రదేశ్‌లో ఎన్నికైన జిల్లా ప్రజా పరిషత్‌ల ఐదేళ్ల పదవీకాలం 2026 సెప్టెంబర్‌ 24తో ముగిసింది. కొత్తగా ఎన్నికైన ప్రజాప్రతినిధులు బాధ్యతలు స్వీకరించే వరకు జిల్లా ప్రజా పరిషత్‌లకు జిల్లా కలెక్టర్లు ప్రత్యేక అధికారులుగా వ్యవహరించనున్నారు. ఈ నేపథ్యంలో అల్లూరి సీతారామరాజు జిల్లా ప్రజా పరిషత్‌ (ZPP–ASR) ప్రత్యేక అధికారిగా జిల్లా కలెక్టర్‌ టి. నిశాంతి బాధ్యతలు స్వీకరించారు. ఈ సందర్భంగా జిల్లా కలెక్టర్‌ మాట్లాడుతూ, అల్లూరి సీతారామరాజు జిల్లాకు ప్రత్యేక జిల్లా ప్రజా పరిషత్‌ ఏర్పాటు కావడం ద్వారా స్థానిక అవసరాలు, ప్రాధాన్యతలకు అనుగుణంగా గ్రామీణాభివృద్ధి, సంక్షేమ కార్యక్రమాలపై మరింత సమగ్ర ప్రణాళిక, సమన్వయం, పర్యవేక్షణకు అవకాశం ఏర్పడిందన్నారు. వికేంద్రీకృత పరిపాలనను మరింత బలోపేతం చేయడంతో పాటు ప్రభుత్వ అభివృద్ధి, సంక్షేమ కార్యక్రమాలు గిరిజన ప్రాంతాల ప్రజలకు మరింత సమర్థవంతంగా చేరేందుకు ZPP–ASR కీలక వేదికగా నిలుస్తుందని పేర్కొన్నారు. అధికారులు, సిబ్బంది అంకితభావం, సమన్వయం, పారదర్శకత, జవాబుదారీతనంతో విధులు నిర్వహిస్తూ గిరిజన ప్రజల సంక్షేమాన్ని ప్రధాన లక్ష్యంగా చేసుకోవాలని సూచించారు. ZPP–ASR కార్యకలాపాలు ప్రస్తుతం పాడేరు ఎంపీడీవో కార్యాలయం నుంచి కొనసాగనున్నాయి. నూతన జిల్లా ప్రజా పరిషత్‌ కార్యాలయ భవనం పాతపాడేరులోని కమ్యూనిటీ భవన్‌లో సిద్ధమవుతోందని అధికారులు తెలిపారు. భవనం సిద్ధమైన అనంతరం రాబోయే 15 నుంచి 20 రోజుల్లో ZPP–ASR కార్యాలయాన్ని పాతపాడేరు కమ్యూనిటీ భవన్‌కు తరలించనున్నట్లు వెల్లడించారు.