ఎయిడ్స్‌పై అవగాహనకు 5కె రెడ్‌ రన్‌

xPress24, VIJAYAWADA, October 8, విజయవాడ: ఎయిడ్స్‌ వ్యాధిపై ప్రతి ఒక్కరూ పూర్తి అవగాహన కలిగి ఉండాలని ఏపీఎస్‌ఏసీ (APSAC) ప్రాజెక్టు డైరెక్టర్‌ స్మరణ రాజ్‌ అన్నారు. ఎయిడ్స్‌ వ్యాధి నివారణపై ప్రజల్లో అవగాహన కల్పించేందుకు విజయవాడలో 5కె రెడ్‌ రన్‌ నిర్వహించారు. ఈ సందర్భంగా స్మరణ రాజ్‌ మాట్లాడుతూ.. హెచ్‌ఐవీ/ఎయిడ్స్‌ వ్యాప్తి, నివారణ చర్యలపై యువతకు సరైన అవగాహన అవసరమన్నారు. తొలిదశలోనే తగిన జాగ్రత్తలు తీసుకోవడం ద్వారా వ్యాధుల వ్యాప్తిని నియంత్రించవచ్చని తెలిపారు. సమాజంలో విస్తృత అవగాహన కల్పించేందుకు సదస్సులు, ర్యాలీలు వంటి కార్యక్రమాలను నిర్వహించడంలో యువత, స్వచ్ఛంద సంస్థలు, ఎన్జీవోలు చురుగ్గా పాల్గొనాలని కోరారు. కళాశాల స్థాయి నుంచే విద్యార్థులు అవగాహన కార్యక్రమాల్లో చురుగ్గా పాల్గొని, హెచ్‌ఐవీ/ఎయిడ్స్‌పై సరైన సమాచారాన్ని తెలుసుకోవాలని సూచించారు. తాము పొందిన అవగాహనను సమాజంలోని ఇతరులకు కూడా చేరవేసి చైతన్యం కల్పించాలని అన్నారు. ఎయిడ్స్‌ బాధితుల పట్ల ఎలాంటి వివక్ష చూపకుండా వారికి మానసిక ధైర్యాన్ని కల్పించడం ప్రతి ఒక్కరి బాధ్యత అని పేర్కొన్నారు. హెచ్‌ఐవీ/ఎయిడ్స్‌ నియంత్రణకు ప్రజల భాగస్వామ్యం ఎంతో అవసరమన్నారు. హెచ్‌ఐవీ వ్యాప్తి నివారణకు తీసుకోవాల్సిన జాగ్రత్తలు, సురక్షిత జీవన విధానం, హెచ్‌ఐవీ పరీక్షల ప్రాధాన్యంపై అవగాహన కల్పించేందుకు ఇలాంటి కార్యక్రమాలు ఎంతగానో దోహదపడతాయని తెలిపారు. విద్యార్థులు, యువత స్వచ్ఛందంగా అవగాహన కార్యక్రమాల్లో పాల్గొని ఎయిడ్స్‌పై ఉన్న అపోహలను తొలగించేందుకు కృషి చేయాలని పిలుపునిచ్చారు.