ఎయిమ్స్ 71వ ఇన్‌స్టిట్యూట్ డే -అనుప్రియా పటేల్

దేశంలో ఆరోగ్య సంరక్షణ మౌలిక సదుపాయాలు గ‌ణ‌నీయంగా విస్త‌రించాయ‌ని కేంద్ర ఆరోగ్య, కుటుంబ సంక్షేమ శాఖ సహాయ మంత్రి అనుప్రియా పటేల్ అన్నారు. న్యూఢిల్లీలోని ఎయిమ్స్ 71వ ఇన్‌స్టిట్యూట్ డే సందర్భంగా ఆమె ఈరోజు మాట్లాడుతూ... ఎయిమ్స్ అనేక సంవత్సరాలుగా లక్షలాది మంది ప్రజల నమ్మకాన్ని సంపాదించుకుందని చెప్పారు. తరువాతి తరం ఆరోగ్య సంరక్షణ నిపుణులకు మార్గనిర్దేశం చేయడంలోను, దేశవ్యాప్తంగా ఉన్న ఇతర వైద్య సంస్థలకు దిశానిర్దేశం చేయడంలో న్యూఢిల్లీలోని ఎయిమ్స్‌కు ఒక ప్రత్యేక బాధ్యత ఉందని పేర్కొన్నారు. ప్రతి పౌరునికి అందుబాటులో సరసమైన, నాణ్యమైన ఆరోగ్య సంరక్షణను అందించడంపై ప్రభుత్వం దృష్టి సారించిందన్నారు. జీవనశైలి వ్యాధుల నివారణ, ముందస్తు గుర్తింపు, సకాలంలో చికిత్సపై దృష్టి పెట్టాల్సిన అవసరం ఎంతైనా ఉంద‌ని, దేశం ఎదుర్కొంటున్న ఆరోగ్య సమస్యలకు పరిష్కారాలు కనుగొనేందుకు నిరంతర పరిశోధనల ద్వారా ఎయిమ్స్ కృషి చేయాల‌ని అనుప్రియా ప‌టేల్ వ్యాఖ్యానించారు.