ఎవరెస్ట్ బేస్ క్యాంప్‌కు ఆదిలాబాద్ ఆదివాసీ బిడ్డలు: ఘనత సాధిస్తున్న కన్నీబాయి, ఆనంద్‌రావు

xPress24, Adilabad, September 23, పర్వతారోహణ రంగంలో ఆదిలాబాద్ జిల్లాకు చెందిన ఆదివాసీ బిడ్డలు అద్వితీయ ప్రతిభ కనబరుస్తున్నారు. అవకాశాలను సద్వినియోగం చేసుకుంటూ రికార్డులు సృష్టిస్తున్న ఇద్దరు గిరిజన యువతీ యువకులు ప్రపంచంలోనే ఎత్తైన ఎవరెస్ట్ బేస్ క్యాంప్ యాత్రకు ఎంపికయ్యారు. ఉట్నూర్ ఐటీడీఏ పరిధిలోని భీమన్‌గొంది గ్రామానికి చెందిన మడావి కన్నీబాయి, ఇచ్చోడ మండలానికి చెందిన కత్లే ఆనంద్‌రావు ఎవరెస్ట్ శిఖరాన్ని చేరుకునేందుకు సన్నద్ధమయ్యారు. అత్యంత వెనుకబడిన తోటి, కోలాం ఆదివాసీ తెగలకు చెందిన వీరిద్దరూ ఆర్థిక ఇబ్బందులను అధిగమించి ఈ యాత్రకు ఈ నెల 23న బయలుదేరారు. సాహస క్రీడల్లో విశేష ప్రతిభ చిన్నప్పటి నుంచే సాహస క్రీడల పట్ల ఆసక్తి పెంచుకున్న కన్నీబాయి, ఆనంద్‌రావులు ఇప్పటికే రాష్ట్ర, జాతీయ స్థాయిల్లో నిర్వహించిన వాటర్ రాపెల్లింగ్ సహా పలు సాహస కృత్యాల పోటీల్లో పాల్గొని సత్తా చాటారు. పర్వతారోహణలో పట్టుదలతో రాణిస్తున్న ఈ బృందాన్ని ఇటీవల ఉట్నూర్‌లో జిల్లా కలెక్టర్ రాజర్షి షా, ఐటీడీఏ పీవో మకరంద్ జెండా ఊపి యాత్రకు వీడ్కోలు పలికారు. మంత్రి సీతక్క అభినందనలు.. సీఎం వద్దకు తీసుకెళ్తానని హామీ హైదరాబాద్‌ సచివాలయంలో రాష్ట్ర పంచాయతీరాజ్, గ్రామీణాభివృద్ధి శాఖ మంత్రి సీతక్క వీరిద్దరినీ ఆప్యాయంగా పలకరించి అభినందించారు. యాత్రను విజయవంతంగా ముగించి దేశానికి, రాష్ట్రానికి కీర్తి తీసుకురావాలని ఆకాంక్షించారు. ఆదివాసీ బిడ్డలు పర్వత శిఖరాలతో పాటు జీవితంలోనూ ఉన్నత స్థానాలకు ఎదగాలని, యాత్ర ముగించుకుని తిరిగి రాగానే ముఖ్యమంత్రి రేవంత్ రెడ్డిని కలుస్తానని హామీ ఇచ్చారు. ప్రభుత్వం తరఫున పూర్తి సహాయ సహకారాలు అందిస్తామని భరోసా ఇచ్చారు. సహకరించిన వారికి కృతజ్ఞతలు: కన్నీబాయి ఎవరెస్ట్ బేస్ క్యాంప్ యాత్రకు ఎంపిక కావడం ఎంతో గర్వంగా ఉందని, యాత్రను విజయవంతంగా పూర్తి చేసి తిరిగి వస్తామని పర్వతారోహకురాలు కన్నీబాయి ధీమా వ్యక్తం చేశారు. తమకు సహకరించిన మంత్రి సీతక్కతో పాటు జిల్లా అధికారులు, ఐటీడీఏ ప్రాజెక్టు అధికారికి కృతజ్ఞతలు తెలిపారు. భవిష్యత్తులో గిరిజన యువతకు పర్వతారోహణలో శిక్షణ ఇచ్చి ప్రోత్సహిస్తామని పేర్కొన్నారు. Byte: మడావి కన్నీబాయి, పర్వతారోహకురాలు, ఆదిలాబాద్