ఏటూరునాగారంలో ఐటీడీఏ ఉద్యోగుల 'అలిగిన బతుకమ్మ' సంబురాలు

xPress24, Mulugu, October 16, ములుగు జిల్లా ఏటూరునాగారం మండల కేంద్రంలోని జంబోరి మైదానంలో ఐటీడీఏ (ITDA) ఆల్ ఎంప్లాయీస్ యూనియన్ ఆధ్వర్యంలో బతుకమ్మ వేడుకలను అత్యంత ఘనంగా నిర్వహించారు. తొమ్మిది రోజుల బతుకమ్మ పండుగలో భాగంగా ఆరో రోజు నిర్వహించే 'అలిగిన బతుకమ్మ' సంబురాల్లో ఐటీడీఏ పరిధిలోని మహిళా ఉద్యోగులు, సిబ్బంది పెద్ద సంఖ్యలో పాల్గొని ఉత్సాహంగా ఆడిపాడారు. సంప్రదాయ పద్ధతిలోనే బతుకమ్మను పేర్చాలి: రేగ కల్యాణి ఈ కార్యక్రమానికి ముఖ్య అతిథిగా హాజరైన ములుగు మార్కెట్ కమిటీ చైర్మన్ రేగ కల్యాణి మాట్లాడుతూ.. ప్రకృతిని ఆరాధించే బతుకమ్మ పండుగలో ఆరో రోజైన అలిగిన బతుకమ్మకు ప్రత్యేకత ఉందని తెలిపారు. గతంలో గుమ్మడి, తంగేడు, గునుగు వంటి ప్రకృతి సిద్ధమైన తీరొక్క పూలతో సంప్రదాయబద్ధంగా బతుకమ్మలను పేర్చేవారని గుర్తుచేశారు. కాలక్రమేణా వస్తున్న మార్పులను పక్కనపెట్టి, మహిళలు, యువతులు మన ప్రాచీన సంస్కృతిని కాపాడుతూ పాత పద్ధతుల్లోనే బతుకమ్మలను పేర్చి పూజించాలని పిలుపునిచ్చారు. ఐకమత్యానికి ప్రతీక: ఈసం అనసూర్య ఐటీడీఏ పరిధిలోని మహిళా ఉద్యోగులంతా ఒకచోట చేరి కలిసిమెలిసి పండుగ జరుపుకోవడం సంతోషంగా ఉందని ఆల్ ఎంప్లాయీస్ యూనియన్ మహిళా కార్యదర్శి ఈసం అనసూర్య పేర్కొన్నారు. ప్రతి ఏటా తొమ్మిది రోజుల పాటు అత్యంత భక్తిశ్రద్ధలతో, ఉత్సాహంగా బతుకమ్మ వేడుకలు నిర్వహిస్తున్నామని, ఈ వేడుకలు ఉద్యోగుల మధ్య పరస్పర ఆత్మీయతను, ఐక్యతను పెంపొందిస్తాయని ఆమె తెలిపారు. బైట్స్ రేగ కల్యాణి, చైర్మన్, ములుగు మార్కెట్ కమిటీ ఈసం అనసూర్య, మహిళా కార్యదర్శి, ఆల్ ఎంప్లాయీస్ యూనియన్