ఏపి హై కోర్టు శాశ్వత న్యాయమూర్తులుగా ఐదుగురు జడ్జిలు బాధ్యతల స్వీకరణ

xPress24, Amaravati, October 5, అమరావతి, అక్టోబర్ 5: ఆంధ్రప్రదేశ్‌ హైకోర్టుకు ఐదుగురు అదనపు న్యాయమూర్తులను శాశ్వత న్యాయమూర్తులుగా నియమించారు. జస్టిస్‌ కుంచం మహేశ్వరరావు, జస్టిస్‌ తూట చంద్ర ధనశేఖర్‌ (టీసీడీ శేఖర్‌), జస్టిస్‌ చల్లా గుణరంజన్‌, జస్టిస్‌ అవధానం హరిహరనాథ శర్మ, జస్టిస్‌ డాక్టర్‌ యడవల్లి లక్ష్మణరావు సోమవారం శాశ్వత న్యాయమూర్తులుగా బాధ్యతలు స్వీకరించారు. ఏపీ హైకోర్టు మొదటి కోర్టు హాల్లో ఫుల్‌ బెంచ్‌ ఆధ్వర్యంలో జరిగిన కార్యక్రమంలో హైకోర్టు ప్రధాన న్యాయమూర్తి జస్టిస్‌ లీసా గిల్‌ ఐదుగురు నూతన శాశ్వత న్యాయమూర్తులతో ప్రమాణ స్వీకారం చేయించారు. రాష్ట్ర హైకోర్టులో ఐదుగురు అదనపు న్యాయమూర్తులను శాశ్వత న్యాయమూర్తులుగా నియమించేందుకు రాష్ట్రపతి ద్రౌపదీ ముర్ము ఆమోదం తెలపడంతో కేంద్ర న్యాయశాఖ అధికారికంగా నోటిఫికేషన్‌ జారీ చేసింది. ఈ నేపథ్యంలో వారి ప్రమాణ స్వీకార కార్యక్రమం నిర్వహించారు. ఈ కార్యక్రమానికి ఏపీ హైకోర్టులో సేవలందిస్తున్న న్యాయమూర్తులు హాజరై నూతన శాశ్వత న్యాయమూర్తులకు శుభాకాంక్షలు తెలిపారు. హైకోర్టు న్యాయమూర్తులు, బార్‌ కౌన్సిల్‌ ప్రతినిధులు, హైకోర్టు అడ్వకేట్స్‌ అసోసియేషన్‌ సభ్యులు, సీనియర్‌ న్యాయవాదులు, న్యాయాధికారులు, రిజిస్ట్రార్లు, న్యాయశాఖ అధికారులు, న్యాయవాదులు తదితరులు కార్యక్రమంలో పాల్గొన్నారు.