కోటబొమ్మాళి అభివృద్ధికి కేంద్ర, రాష్ట్ర మంత్రుల శ్రీకారం

xPress24, Srikakulam, October 13, శ్రీకాకుళం జిల్లా, అక్టోబర్ 13: కోటబొమ్మాళి ప్రాంత అభివృద్ధిపై కేంద్ర, రాష్ట్ర ప్రభుత్వాలు ప్రత్యేక దృష్టి సారించాయి. గ్రామీణ మౌలిక సదుపాయాల మెరుగుదల, ప్రభుత్వ కార్యాలయాల ఆధునికీకరణ, పర్యాటక అభివృద్ధి లక్ష్యంగా రూ.5.79 కోట్ల విలువైన పలు అభివృద్ధి పనులకు కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు, రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు మంగళవారం శ్రీకారం చుట్టారు. కోటబొమ్మాళి మండలం కొత్తపేట గ్రామంలోని మైక్రో టవర్‌ (రిపీటర్‌ స్టేషన్‌) కొండకు రహదారుల నిర్మాణం, కోటబొమ్మాళి తహశీల్దార్‌ కార్యాలయ పునర్నిర్మాణం, మండల పరిషత్‌ భవనం పునరుద్ధరణ, సుందరీకరణ పనులకు వారు శంకుస్థాపన చేశారు. ఈ పనులు పూర్తయితే రవాణా సౌకర్యాలు మెరుగుపడటంతో పాటు ప్రభుత్వ కార్యాలయాల్లో మౌలిక వసతులు అభివృద్ధి చెందనున్నాయి. పర్యాటక కేంద్రంగా మైక్రో టవర్‌ కొండ కొత్తపేట గ్రామంలోని మైక్రో టవర్‌ కొండను పర్యాటక ఆకర్షణ కేంద్రంగా తీర్చిదిద్దేందుకు ప్రత్యేక ప్రణాళిక రూపొందిస్తున్నట్లు మంత్రి కింజరాపు అచ్చెన్నాయుడు తెలిపారు. కొండపైకి వెళ్లేందుకు రహదారి సౌకర్యాలను మెరుగుపరచడంతో పాటు, పర్యాటకులకు ఆహ్లాదకరమైన వాతావరణం కల్పించేలా సమగ్ర అభివృద్ధి ప్రణాళిక సిద్ధం చేయాలని అధికారులను ఆదేశించారు. ఈ అభివృద్ధి పనుల ద్వారా కోటబొమ్మాళి ప్రాంతంలో మౌలిక సదుపాయాలు మెరుగుపడటంతో పాటు పర్యాటక రంగానికి కూడా ఊతం లభించనుంది. ప్రభుత్వ కార్యాలయాల ఆధునికీకరణతో ప్రజలకు మెరుగైన సేవలు అందించే అవకాశం ఏర్పడనుంది.