క్యాన్సర్ మందుల ట్రేడ్ మార్జిన్‌పై 30 శాతం పరిమితి.. అన్ని ఔషధాల ధరల సమీక్షకు అత్యున్నత న్యాయస్థానం ఆదేశం

xPress24, Delhi, October 13, ప్రాణాంతక క్యాన్సర్ చికిత్సలో వాడే మందుల వ్యాపార లాభాలపై గరిష్ఠ పరిమితి విధించాలని నిర్ణయించినట్లు కేంద్ర ప్రభుత్వం సుప్రీంకోర్టుకు తెలిపింది. గరిష్ఠ చిల్లర ధర (MRP)పై ట్రేడ్ మార్జిన్‌ను 30 శాతానికి పరిమితం చేయనున్నట్లు వెల్లడించింది. అయితే కేవలం క్యాన్సర్ మందులకే కాకుండా, ఫార్మాస్యూటికల్ రంగంలోని అన్ని రకాల ప్రాణాధార ఔషధాలు, వైద్య పరికరాల అధిక ధరలపై సమగ్ర సమీక్ష జరపాలని సుప్రీంకోర్టు స్పష్టం చేసింది. క్యాన్సర్ మందుల జాబితా నోటిఫై చేస్తాం జస్టిస్ విక్రమ్ నాథ్, జస్టిస్ సందీప్ మెహతాలతో కూడిన ధర్మాసనం ఎదుట కేంద్రం తరఫున సొలిసిటర్ జనరల్ తుషార్ మెహతా వాదనలు వినిపించారు. 30 శాతం మార్జిన్ పరిమితి వర్తించే క్యాన్సర్ మందుల జాబితాను త్వరలోనే నోటిఫై చేస్తామని చెప్పారు. మార్కెట్ పరిస్థితులు, ప్రజారోగ్య ప్రయోజనాలను బట్టి తక్కువ ధర ఉన్న సాధారణ మందులను మినహాయిస్తూ, అవసరాన్ని బట్టి ఈ జాబితాను ఎప్పటికప్పుడు సవరిస్తామని తెలిపారు. రిటైలర్లకు సరఫరా చేసే ధరకు, డబ్బాలపై ముద్రించే ఎంఆర్‌పీకి మధ్య ఉన్న భారీ తేడా వల్ల రోగులపై తీవ్ర ఆర్థిక భారం పడుతోందంటూ సుప్రీంకోర్టు గతంలో వ్యక్తం చేసిన ఆందోళనల నేపథ్యంలో కేంద్రం ఈ నిర్ణయం తీసుకుంది. అన్ని రకాల మందుల పరిస్థితి ఏమిటి? సుప్రీంకోర్టు ఈ నిర్ణయం కేవలం క్యాన్సర్ మందులకే కాకుండా మిగిలిన విభాగాల్లోని అధిక మార్జిన్ల సమస్యను పరిష్కరిస్తుందా అని ధర్మాసనం ప్రశ్నించింది. దేశీయంగా తయారయ్యే గుండె స్టెంట్ ధర సరఫరాదారు వద్ద రూ.5,000 ఉంటే, మార్కెట్లో దాని ఎంఆర్‌పీ ఏకంగా రూ.25,000గా ఉంటోందని, ఇంతటి భారీ వ్యత్యాసం సమర్థనీయం కాదని ధర్మాసనం ఉదాహరణగా పేర్కొంది. స్టెంట్ల ధరలపై ఇప్పటికే నియంత్రణ ఉందని తుషార్ మెహతా వివరించారు. ఈ పిటిషన్‌పై తదుపరి విచారణను సుప్రీంకోర్టు అక్టోబర్ 27వ తేదీకి వాయిదా వేసింది.