కరీంనగర్‌లో 'ఎకాం' ఉమెన్ ఎంట్రప్రెన్యూర్ ఎగ్జిబిషన్

xPress24, Karimnagar, October 5, మహిళా పారిశ్రామికవేత్తలు స్వయంశక్తితో ఆర్థికంగా ఎదుగుతూ పది మందికి ఉపాధి కల్పించేలా ప్రోత్సహించాల్సిన బాధ్యత సమాజంపై ఉందని మాజీ మంత్రి, కరీంనగర్ ఎమ్మెల్యే గంగుల కమలాకర్ పేర్కొన్నారు. కరీంనగర్‌లోని మహాత్మా జ్యోతిబా పూలే మైదానంలో 'ఎకాం' (EKAM) సంస్థ ఆధ్వర్యంలో ఏర్పాటు చేసిన ప్రత్యేక ఉత్పత్తుల ప్రదర్శనను ఆయన ఘనంగా ప్రారంభించారు. ఈ ఎక్స్‌పోలో కరీంనగర్‌తో పాటు ఇతర ప్రాంతాల నుండి దాదాపు 50 మంది చిన్న తరహా వ్యాపారులు తమ స్టాళ్లను ఏర్పాటు చేసుకున్నారు. రాబోయే పండుగల సీజన్‌ను దృష్టిలో ఉంచుకుని మహిళల అలంకరణ వస్తువులు, చేనేత చీరలు, వన్ గ్రామ్ గోల్డ్, పూర్తిగా ఆర్గానిక్ పదార్థాలతో చేసిన వస్తువులు, హ్యాండ్‌మేడ్ క్రాఫ్ట్స్ మరియు ఎలక్ట్రానిక్ వస్తువులను ఇక్కడ ప్రదర్శనకు ఉంచారు. తయారీదారుల నుంచే నేరుగా తక్కువ ధరలకు నాణ్యమైన ఉత్పత్తులు లభించడం ఈ ప్రదర్శన ప్రత్యేకత అని, చిన్న వ్యాపారాలు చేసే మహిళలకు 'ఎకాం' చక్కటి వేదికగా నిలుస్తోందని గంగుల కమలాకర్ కొనియాడారు. ప్రజలు ఈ ఎగ్జిబిషన్‌ను సందర్శించి కొనుగోళ్లు చేయడంతో పాటు సోషల్ మీడియా ద్వారా ఈ ఉత్పత్తులకు ప్రచారం కల్పించాలని పిలుపునిచ్చారు. శని, ఆదివారాలు జరిగే ఈ రెండు రోజుల ప్రదర్శనకు లభించే ఆదరణను బట్టి భవిష్యత్తులో మరింత పెద్ద ఎత్తున ప్రదర్శనలు నిర్వహిస్తామని నిర్వాహకులు మున్మున్ సేన్ మరియు విశాల్ తెలిపారు.