గచ్చిబౌలిలో డాక్టర్ మన్మోహన్ సింగ్ కాంస్య విగ్రహ ఆవిష్కరణ ఏర్పాట్లు

xPress24, Hyderabad, September 25, హైదరాబాద్ గచ్చిబౌలి ఐటీ కారిడార్‌లోని విప్రో సర్కిల్ వద్ద మాజీ ప్రధానమంత్రి డాక్టర్ మన్మోహన్ సింగ్ కాంస్య విగ్రహ ఏర్పాటు పనులు పూర్తయ్యాయి. ఈ విగ్రహాన్ని ముఖ్యమంత్రి ఎ రేవంత్ రెడ్డి శనివారం ఆవిష్కరించనున్నారు. ఈ కార్యక్రమానికి సంబంధించిన ఏర్పాట్లను హైదరాబాద్ ఇంచార్జి మంత్రి పొన్నం ప్రభాకర్ పరిశీలించారు. ఈ సందర్భంగా మంత్రి మాట్లాడుతూ… దేశ ఆర్థిక వ్యవస్థకు, ప్రజా సంక్షేమానికి మాజీ ప్రధాని అందించిన సేవలు చిరస్మరణీయమని తెలిపారు. 1991లో ఆర్థిక మంత్రిగా ఆయన చేపట్టిన సంస్కరణలు దేశ ఆర్థిక వ్యవస్థలో కీలక మార్పులకు దోహదపడ్డాయని గుర్తుచేశారు. దేశాభివృద్ధికి విశేష సేవలందించిన మాజీ ప్రధాని 2004 నుంచి 2014 మధ్య కాలంలో ప్రధానమంత్రిగా ప్రజా సంక్షేమం, ఆర్థిక స్థిరత్వం, దేశాభివృద్ధికి మన్మోహన్ సింగ్ విశేష సేవలందించారని మంత్రి పొన్నం ప్రభాకర్ పేర్కొన్నారు. ఈ విగ్రహం భావితరాలకు ఆయన సేవలను గుర్తుచేసే ముఖ్యమైన స్మారక చిహ్నంగా నిలుస్తుందని స్పష్టం చేశారు. విగ్రహ ఆవిష్కరణ కార్యక్రమానికి అన్ని ఏర్పాట్లు పూర్తి చేసినట్లు తెలిపారు. ఏర్పాట్ల పరిశీలన, పకడ్బందీ చర్యలు విగ్రహ ఆవిష్కరణ సభ జరిగే ప్రాంతంలో భద్రత, ట్రాఫిక్ నియంత్రణ, ఇతర ఏర్పాట్లను అధికారులతో కలిసి మంత్రి పరిశీలించారు. ఎలాంటి అసౌకర్యం కలగకుండా అన్ని చర్యలు తీసుకోవాలని అధికారులను ఆదేశించారు.