చెక్ రిపబ్లిక్ డిప్యూటీ ప్రధాని కారెల్ హవ్లిచెక్‌తో రక్షణ మంత్రి రాజ్‌నాథ్ సింగ్ భేటీ

xPress24, Delhi, October 13, భారత్, చెక్ రిపబ్లిక్ దేశాల మధ్య ద్వైపాక్షిక సంబంధాలను మరింత బలోపేతం చేసుకునే దిశగా కీలక చర్చలు జరిగాయి. చెక్ రిపబ్లిక్ ఉప ప్రధాని, పరిశ్రమలు, వాణిజ్య శాఖ మంత్రి కారెల్ హవ్లిచెక్‌తో రక్షణ మంత్రి రాజ్‌నాథ్ సింగ్ న్యూఢిల్లీలో ద్వైపాక్షిక సమావేశం నిర్వహించారు. ఇరు దేశాల మధ్య రక్షణ, పారిశ్రామిక, వాణిజ్య భాగస్వామ్యాల విస్తరణపై ఈ భేటీలో విస్తృతంగా చర్చించారు. శతాబ్దాల నాటి చారిత్రక బంధం: రాజ్‌నాథ్ సింగ్ ఈ సందర్భంగా రక్షణ మంత్రి రాజ్‌నాథ్ సింగ్ మాట్లాడుతూ.. భారత్, చెక్ రిపబ్లిక్‌ల మధ్య సంబంధాలు పరస్పర గౌరవం, ప్రజాస్వామ్య విలువలు, అంతర్జాతీయ నిబంధనలకు కట్టుబడి ఉండే దీర్ఘకాలిక స్నేహపూర్వక పునాదులపై ఆధారపడి ఉన్నాయని పేర్కొన్నారు. 9వ శతాబ్దంలోనే కింగ్‌డమ్ ఆఫ్ బొహేమియాతో భారత్ సుగంధ ద్రవ్యాలు, వస్త్రాల వాణిజ్యం నిర్వహించిందని, ఇరు దేశాల సంబంధాలు శతాబ్దాల నాటివని గుర్తుచేశారు. మారుతున్న కాలానుగుణంగా నేడు రక్షణ, అత్యాధునిక సాంకేతికత రంగాల్లో ఈ బంధం మరింత పటిష్టమవుతోందని ఆయన స్పష్టం చేశారు.