జిబౌటి తీరంలో వలసదారుల పడవ మునక: 15 మంది చిన్నారులు సహా 139 మంది మృతి

xPress24, South africa, October 12, తూర్పు ఆఫ్రికా దేశమైన జిబౌటి తీరంలో ఘోర పడవ ప్రమాదం సంభవించింది. 305 మంది వలసదారులతో ప్రయాణిస్తున్న ఒక పడవ బోల్తా పడి మునిగిపోవడంతో 15 మంది చిన్నారులు సహా కనీసం 139 మంది ప్రాణాలు కోల్పోయారు. ఈ విషాద ఘటనను అంతర్జాతీయ వలసల సంస్థ (IOM) అధికారికంగా ధ్రువీకరించింది. ఒబోక్ ఉత్తర ప్రాంతంలోని గుహెరే సమీపంలో గురువారం రాత్రి బయలుదేరిన కొద్దిసేపటికే తీరానికి సమీపంలోనే ఈ పడవ మునిగిపోయింది. మృతుల సంఖ్య పెరిగే అవకాశం.. 84 మంది గల్లంతు ప్రస్తుతానికి మృతుల సంఖ్య 139గా ఉందని, అయితే స్థానిక యంత్రాంగం ఖననం చేసిన మృతదేహాల లెక్క మాత్రమే ఇదని జిబౌటి ఐఓఎం మిషన్ చీఫ్ అలెగ్జాండ్రే కొయిస్సాక్ తెలిపారు. తోటి వలసదారులు స్వయంగా పూడ్చిపెట్టిన మృతదేహాలు ఇందులో ఇంకా కలవలేదని స్పష్టం చేశారు. మరో 84 మంది జాడ తెలియకపోవడంతో గాలింపు చర్యలు కొనసాగుతున్నాయి. దీంతో మృతుల సంఖ్య మరింత పెరిగే అవకాశం ఉందని ఐఓఎం ఆందోళన వ్యక్తం చేసింది. 80 మందికి పైగా ప్రాణాలతో రక్షణ.. అంతా ఇథియోపియన్లే ప్రమాదం నుంచి 80 మందికి పైగా వలసదారులు ప్రాణాలతో బయటపడగా, వారిని రెస్క్యూ బృందాలు కాపాడాయి. బాధితులంతా ఇథియోపియా దేశానికి చెందినవారేనని అధికారులు వెల్లడించారు. వీరిని ఒబోక్‌లోని ఐఓఎం రెస్క్యూ సెంటర్‌కు తరలించి, వైద్య సహాయంతో పాటు మానసిక కౌన్సిలింగ్ అందిస్తున్నారు. గల్ఫ్ దేశాలకు వెళ్లే ప్రమాదకర మార్గం ఈ పడవ బాబ్ ఎల్-మండేబ్ జలసంధి గుండా జిబౌటి నుంచి యెమెన్‌కు వెళ్లే ప్రయత్నంలో ఉండగా ఈ ప్రమాదం జరిగింది. ఉపాధి, రక్షణ కోసం హార్న్ ఆఫ్ ఆఫ్రికా నుంచి గల్ఫ్ దేశాలకు వెళ్లే వేలాది మంది వలసదారులు ఈ అత్యంత ప్రమాదకరమైన మార్గాన్నే ఎంచుకుంటారు. గత ఏడాది ఒక్క సంవత్సరంలోనే ఈ మార్గంలో 900 మందికి పైగా వలసదారులు చనిపోవడమో లేదా గల్లంతవడమో జరిగిందని ఐఓఎం 'మిస్సింగ్ మైగ్రెంట్స్ ప్రాజెక్ట్' వెల్లడించింది.