టెక్కలి నియోజకవర్గ అభివృద్ధికి ప్రత్యేక ప్రాధాన్యం

xPress24, SRIKAKULAM, October 8, టెక్కలి: టెక్కలి నియోజకవర్గ అభివృద్ధికి కూటమి ప్రభుత్వం ప్రత్యేక ప్రాధాన్యమిస్తోందని రాష్ట్ర వ్యవసాయశాఖ మంత్రి కింజరాపు అచ్చెన్నాయుడు తెలిపారు. ప్రజలకు అవసరమైన మౌలిక వసతుల కల్పనతో పాటు మహిళలు, చిన్నారుల సంక్షేమం, భూగర్భ జలాల పరిరక్షణ, పరిపాలనా సౌకర్యాల విస్తరణకు ప్రభుత్వం పెద్దపీట వేస్తోందని పేర్కొన్నారు. శ్రీకాకుళం జిల్లా టెక్కలి మండల కేంద్రంలో గురువారం పలు అభివృద్ధి పనులకు మంత్రి శంకుస్థాపనలు, ప్రారంభోత్సవాలు నిర్వహించారు. మొత్తం రూ.3.45 కోట్ల అంచనా వ్యయంతో చేపట్టనున్న వివిధ అభివృద్ధి పనులకు ఈ సందర్భంగా శ్రీకారం చుట్టారు. ఈ సందర్భంగా మంత్రి అచ్చెన్నాయుడు మాట్లాడుతూ.. టెక్కలి నియోజకవర్గంలో ప్రజలకు మెరుగైన మౌలిక వసతులు అందించేందుకు ప్రభుత్వం కృషి చేస్తోందన్నారు. మహిళలు, చిన్నారుల సంక్షేమానికి అవసరమైన చర్యలు చేపడుతున్నామని తెలిపారు. భూగర్భ జలాల పరిరక్షణతో పాటు పరిపాలనా సౌకర్యాలను ప్రజలకు మరింత చేరువ చేసేందుకు చర్యలు తీసుకుంటున్నట్లు చెప్పారు. ప్రభుత్వ భూముల పరిరక్షణను తన బాధ్యతగా భావిస్తున్నానని మంత్రి స్పష్టం చేశారు. టెక్కలి నియోజకవర్గంలో ప్రభుత్వ భూములను కాపాడేందుకు కట్టుదిట్టమైన చర్యలు తీసుకుంటామని తెలిపారు. అభివృద్ధి పనులను నాణ్యతా ప్రమాణాలతో, నిర్ణీత సమయంలో పూర్తి చేయాలని అధికారులను ఆదేశించారు.