తిరుమలలో కొనసాగుతున్న నవరాత్రి బ్రహ్మోత్సవాలు

xPress24, Tirupati, October 12, తిరుమల, అక్టోబర్ 12, 2026: తిరుమలలో శ్రీవేంకటేశ్వర స్వామివారి నవరాత్రి బ్రహ్మోత్సవాలు వైభవంగా కొనసాగుతున్నాయి. ఇందులో భాగంగా సోమవారం ఉదయం బంగారు తిరుచ్చి ఉత్సవాన్ని నిర్వహించారు. ఉభయ దేవేరులతో కలిసి మలయప్ప స్వామివారు బంగారు తిరుచ్చిపై మాడ వీధుల్లో విహరించి భక్తులకు దర్శనమిచ్చారు. ఈ రోజు రాత్రి 7 నుంచి 9 గంటల వరకు పెద్దశేష వాహన సేవ నిర్వహించనున్నారు. దసరా సెలవుల నేపథ్యంలో తిరుమలకు భక్తుల రద్దీ పెరిగే అవకాశం ఉందని అంచనా వేస్తున్న టీటీడీ అధికారులు, భక్తులకు ఎలాంటి అసౌకర్యం కలగకుండా అందుకు అనుగుణంగా ఏర్పాట్లు చేస్తున్నట్లు తెలిపారు.