తెలంగాణలో 1,525 కొత్త సహకార సంఘాల ఏర్పాటు లక్ష్యం: కేంద్ర మంత్రి కిషన్ రెడ్డి

xPress24, Medak, October 5, మెదక్ జిల్లా  తెలంగాణ రాష్ట్రంలో 1,525 కొత్త సహకార సంఘాలను ఏర్పాటు చేయాలని కేంద్ర ప్రభుత్వం లక్ష్యంగా నిర్ణయించుకుందని కేంద్ర బొగ్గు, గనుల శాఖ మంత్రి జి. కిషన్ రెడ్డి తెలిపారు. మెదక్ జిల్లా తూప్రాన్ మండలం బ్రాహ్మణపల్లి వద్ద సాబర్ డెయిరీ ప్లాంట్ నిర్మాణానికి ఆయన భూమిపూజ చేశారు. ఈ కార్యక్రమంలో కేంద్ర మంత్రి బండి సంజయ్ కుమార్, రాష్ట్ర మంత్రులు దుద్దిళ్ల శ్రీధర్ బాబు, జి. వివేక్, ఎంపీ మాధవనేని రఘునందన్ రావు తదితరులు పాల్గొన్నారు. ఈ సందర్భంగా కేంద్ర మంత్రి కిషన్ రెడ్డి మాట్లాడుతూ... తెలంగాణ డెయిరీ రంగ అభివృద్ధిలో సాబర్ డెయిరీ ప్రాజెక్టు ఒక ముఖ్యమైన మైలురాయిగా నిలుస్తుందని, ఇది పాడి రైతులను ఆర్థికంగా మరింత బలోపేతం చేస్తుందని ఆశాభావం వ్యక్తం చేశారు. రైతులు కేవలం వరి, పత్తి, మిర్చి వంటి సంప్రదాయ పంటలకే పరిమితం కాకుండా, వ్యవసాయానికి అనుబంధంగా పాడి పరిశ్రమపై దృష్టి పెడితే అదనపు ఆదాయం సమకూరుతుందని కిషన్ రెడ్డి సూచించారు. తెలంగాణలో కో-ఆపరేటివ్ (సహకార) వ్యవస్థను ఉద్యమ స్థాయిలో విస్తరించాల్సిన అవసరం ఉందని, ఇక్కడి రైతులు మరియు మహిళలు పెద్ద సంఖ్యలో సహకార సంఘాలుగా ఏర్పడాలని ఆయన పిలుపునిచ్చారు. 2047 నాటికి 'వికసిత్ భారత్' సాధనలో సహకార రంగం దేశ ఆర్థిక వ్యవస్థకు అత్యంత కీలకమైన బలమైన స్తంభంగా నిలవాలని ఈ సందర్భంగా కేంద్ర మంత్రి ఆకాంక్షించారు.