నైజీరియాలో విమానం కూలి 32 మంది మృతి

xPress24, Hyderabad, October 6, నైజీరియాలో జరిగిన విమాన ప్రమాదంలో ముప్పై మందికి పైగా ప్రాణాలు కోల్పోయారు. బెనిన్ సిటీ నుంచి లాగోస్‌కు ప్రయాణిస్తున్న నైజీరియా వైమానిక దళానికి చెందిన ATR42 సైనిక విమానం కుప్పకూలింది. ఈ ఘటనలో విమానంలో ఉన్న ఇరవై ఐదు మంది ప్రయాణికులు, ఏడుగురు సిబ్బందితో సహా మొత్తం ముప్పై రెండు మంది అక్కడికక్కడే మృతి చెందారు. ప్రమాదానికి గల ఖచ్చితమైన కారణాలను తేల్చేందుకు తక్షణమే సమగ్ర దర్యాప్తు ప్రారంభించాలని నైజీరియా అధ్యక్షుడు బోలా టినుబు ఆదేశించారు. సాధారణ విధి నిర్వహణలో ఉన్న ఈ మిలిటరీ విమానం ప్రయాణిస్తుండగా ఎయిర్ ట్రాఫిక్ కంట్రోలర్లతో అకస్మాత్తుగా సంబంధాలు తెగిపోయాయి. అనంతరం నైరుతి నైజీరియాలోని ఇగ్బోకోడా తీరప్రాంత పట్టణం సమీపంలో ఉన్న ఒక నావికా స్థావరానికి దగ్గరగా విమాన శకలాలను గుర్తించారు. దర్యాప్తు నివేదిక వచ్చిన తర్వాతే ప్రమాద కారణాలను వెల్లడిస్తామని అక్కడి ప్రభుత్వం చెప్పింది.