నేడు మూడంతరాల పూల శోభ ముద్దపప్పు బతుకమ్మ

xPress24, Hyderabad, October 12, తెలంగాణ బతుకమ్మ వేడుకల్లో మూడో రోజైన విదియ నాడు అమ్మవారిని ముద్దపప్పు బతుకమ్మగా ఆరాధిస్తారు. ఈ రోజున బతుకమ్మను మూడు ఎత్తులలో అందంగా పేర్చి, శిఖరంపై గౌరమ్మను ప్రతిష్టిస్తారు. ఈ అమరికలో చామంతి, మందార, సీతమ్మజడ, రామబాణం వంటి రకరకాల పూలను ఉపయోగిస్తారు. ఇళ్లలోని ఆడబిడ్డలందరూ ఉత్సాహంగా కలసికట్టుగా ఈ మూడంతరాల బతుకమ్మను తీర్చిదిద్దుతారు. ఈ పూల పండుగలో మూడో రోజు వేడుకకు ప్రత్యేకత ఉంది. పెసరపప్పుతో కూడిన ముద్దపప్పును అమ్మవారికి నైవేద్యంగా సమర్పిస్తారు కాబట్టి దీనికి ఆ పేరు వచ్చింది. ముద్దపప్పుతో పాటు పాలు, బెల్లంతో చేసిన వంటకాలను నైవేద్యంగా నివేదిస్తారు. అంతేకాకుండా కొందరు పుట్నాల పిండి, బియ్యప్పిండి, బెల్లం, ఎండు కొబ్బరి, నువ్వులు, పాలతో చేసిన చలివిడి ముద్దలను లేదా గారెలను తయారు చేసి భక్తితో సమర్పిస్తారు. చిన్ననాటి నుంచి ఆరోగ్యాకి, జ్ఞాపకశక్తికి ఎంతో ప్రాధాన్యం ఇచ్చే పెసరపప్పును మన సంప్రదాయంలో ఎక్కువగా వాడుతుంటారు. అమ్మవారికి సైతం పెసరపప్పుతో చేసే వంటకాలంటే ఎంతో ప్రీతి అని భావిస్తారు. పూజ ముగిసిన తర్వాత అమ్మకు నివేదించిన ముద్దపప్పు, బెల్లం ప్రసాదాన్ని కుటుంబ సభ్యులకు, తోటివారికి ఆప్యాయంగా పంచుకుంటారు. ఈ ప్రసాదాన్ని చిన్నారులు ఎంతో ఇష్టంగా ఆరగించి ఆనందిస్తారు. సూర్యుడు అస్తమించే వేళ మహిళలందరూ తాము పేర్చిన బతుకమ్మలను తలపై పెట్టుకుని ఊరందరూ ఒకచోట చేరుకుంటారు. బతుకమ్మ బతుకమ్మ ఉయ్యాలో అంటూ లయబద్ధమైన పాటలతో ఊరంతా హోరెత్తేలా ఆటలాడతారు. అనంతరం చెరువుల వద్దకు చేరుకుని గౌరమ్మను జలశయాల్లో భక్తిశ్రద్ధలతో నిమజ్జనం చేస్తారు. ఒకరికొకరు వాయినాలు ఇచ్చిపుచ్చుకుంటూ ఈ మూడో రోజు పండుగ సంబరాలను సంతోషంగా ముగిస్తారు.  మట్టి పరిమళాలను పూల సిరులుగా మలిచి, ప్రకృతిని కన్నతల్లిలా కొలిచే అపురూప వేడుక  బతుకమ్మ. తరతరాల సాంస్కృతిక వైభవానికి, తెలంగాణ ఆడబిడ్డల ఆత్మగౌరవానికి ఈ పూల పండుగ నిత్య నిలువెత్తు రూపం.