నిరుద్యోగ యువతను కాంగ్రెస్ సర్కార్ మోసం చేసింది: బీజేపీ ఎంపీ డీకే అరుణ

xPress24, Mahabubnager, October 2, ఎన్నికల ముందు యువతకు ఇచ్చిన హామీలను తుంగలో తొక్కి కాంగ్రెస్ ప్రభుత్వం నిరుద్యోగులను మోసం చేసిందని మహబూబ్‌నగర్ బీజేపీ ఎంపీ డీకే అరుణ విమర్శించారు. మహబూబ్‌నగర్ జిల్లా కేంద్రంలో నిర్వహించిన పట్టభద్రుల ఎమ్మెల్సీ ఎన్నికల సన్నాహక సమావేశంలో ఆమె ముఖ్య అతిథిగా పాల్గొన్నారు. ఈ సందర్భంగా డీకే అరుణ మాట్లాడుతూ.. ఉద్యోగాల భర్తీ, జాబ్ క్యాలెండర్ అమలుపై కాంగ్రెస్ పార్టీ మాట తప్పిందని విమర్శించారు.. జాబ్ క్యాలెండర్ ఏది?. రాష్ట్రంలో లక్షలాది మంది పట్టభద్రులు, నిరుద్యోగ యువత నోటిఫికేషన్ల కోసం ఆశగా ఎదురుచూస్తుంటే ప్రభుత్వం వారి గోడును ఏమాత్రం పట్టించుకోవడం లేదని డీకే అరుణ విమర్శించారు. అధికారంలోకి రాగానే క్రమం తప్పకుండా జాబ్ క్యాలెండర్ విడుదల చేస్తామని ప్రకటించి, ఇప్పటివరకు దాన్ని అమలు చేయకుండా కాలయాపన చేస్తోందని ఆరోపించారు. తమ న్యాయమైన హక్కుల కోసం, ఉపాధి కోసం శాంతియుతంగా నిరసనలు తెలుపుతున్న యువతను అక్రమంగా అరెస్టు చేస్తూ ప్రజా ప్రభుత్వం నిరంకుశంగా వ్యవహరిస్తోందని ఆగ్రహం వ్యక్తం చేశారు. పట్టభద్రుల ఎమ్మెల్సీలో బీజేపీ విజయం ఖాయం గత బీఆర్‌ఎస్ ప్రభుత్వ హయాంలో నియంతృత్వ పాలన చూశామని, ఇప్పుడు అధికారంలో ఉన్న కాంగ్రెస్ ప్రభుత్వం అంతకుమించి అణచివేత ధోరణిని అవలంబిస్తోందని డీకే అరుణ ఆరోపించారు. కాంగ్రెస్, బీఆర్‌ఎస్ రెండూ నాణేనికి ఉన్న రెండు ముఖాల్లాంటివేనని, ప్రజలకు ఇప్పటికే ఈ రెండు పార్టీల తీరుపై పూర్తి అవగాహన వచ్చిందని పేర్కొన్నారు. రాష్ట్రంలోని విద్యావంతులు, యువత బీజేపీ వైపు మొగ్గు చూపుతున్నారని, రాబోయే పట్టభద్రుల ఎమ్మెల్సీ ఎన్నికల్లో బీజేపీ అభ్యర్థి ఘన విజయం సాధించడం ఖాయమని ధీమా వ్యక్తం చేశారు. బైట్: డీకే అరుణ, మహబూబ్‌నగర్ ఎంపీ (బీజేపీ)