నిరుపేద కుటుంబాల అభ్యున్నతికి ‘సమావేశి ఆజీవిక యోజన’

xPress24, Amaravati, October 13, అమరావతి, అక్టోబర్ 13: రాష్ట్రంలోని అత్యంత నిరుపేద కుటుంబాలను ఆర్థికంగా ఆదుకుని, వారికి స్థిరమైన జీవనోపాధి కల్పించే లక్ష్యంతో రాష్ట్ర ప్రభుత్వం ‘సమావేశి ఆజీవిక యోజన’ కార్యక్రమాన్ని ప్రారంభించిందని పేదరిక నిర్మూలన శాఖ మంత్రి కొండపల్లి శ్రీనివాస్ తెలిపారు. దీనదయాళ్ అంత్యోదయ యోజన–జాతీయ గ్రామీణ జీవనోపాధుల మిషన్ (DAY-NRLM) కింద అమలు చేస్తున్న ఈ పథకం ద్వారా రాష్ట్రంలో 10 వేల అత్యంత నిరుపేద కుటుంబాలను పేదరికం నుంచి బయటపడేయాలని లక్ష్యంగా నిర్దేశించినట్లు ఆయన ఒక ప్రకటనలో వెల్లడించారు. యానాది, చెంచు తెగల జనాభా అధికంగా ఉన్న 26 మండలాల్లోని 650 గ్రామ సంఘాల పరిధిలో అర్హులైన కుటుంబాలను గుర్తించి, ఈ పథకం ద్వారా వారికి ఆర్థికంగా చేయూతనందించనున్నట్లు మంత్రి తెలిపారు. నిరుపేద కుటుంబాలకు జీవనోపాధి అవకాశాలు కల్పించి, వారి ఆర్థిక స్థితిగతులను మెరుగుపరిచేందుకు ఈ కార్యక్రమం దోహదపడుతుందని పేర్కొన్నారు.