నరసింగోలులో ‘మీ భూమి – మీ హక్కు’ కార్యక్రమంలో పాల్గొన్న సీఎం చంద్రబాబు

xPress24, Ongole, October 9, ప్రకాశం జిల్లా, అక్టోబర్ 9: కొండపి నియోజకవర్గంలోని నరసింగోలులో శుక్రవారం నిర్వహించిన ‘మీ భూమి – మీ హక్కు’ కార్యక్రమంలో ముఖ్యమంత్రి నారా చంద్రబాబు నాయుడు పాల్గొన్నారు. ఈ సందర్భంగా నియోజకవర్గంలో పలు అభివృద్ధి పనులకు శంకుస్థాపన చేశారు. ముప్పాళ్ల వద్ద రూ.27.85 కోట్ల వ్యయంతో బ్రిడ్జి నిర్మాణంతో పాటు, పోతుల చెంచయ్య పాలేరు రిజర్వాయర్‌ స్పిల్‌వే, ప్రధాన తూముల నిర్మాణ పనులకు ముఖ్యమంత్రి శంకుస్థాపన చేశారు. ప్రకాశం జిల్లాలో దశాబ్దాలుగా అపరిష్కృతంగా ఉన్న గర్భకండ్రిక భూ సమస్యలను పరిష్కరించి, అర్హులైన రైతులకు హక్కు పత్రాలు అందించేందుకు ప్రభుత్వం చర్యలు చేపట్టింది. ఈ కార్యక్రమంలో భాగంగా భూ సమస్యల పరిష్కారంపై దృష్టి సారించారు. ఈ కార్యక్రమానికి మంత్రులు ఆనం రామనారాయణరెడ్డి, డోలా బాలవీరాంజనేయస్వామి, గొట్టిపాటి రవికుమార్, అనగాని సత్యప్రసాద్‌తో పాటు ఉమ్మడి ప్రకాశం జిల్లా ప్రజాప్రతినిధులు హాజరయ్యారు.