నషా ముక్త్ భారత్‌పై అవగాహన హెల్త్ వాక్

xPress24, Anantapur, September 30, అనంతపురం: యువత ఆరోగ్యకరమైన జీవనశైలిని అలవర్చుకోవాలని అనంతపురం జవహర్‌లాల్ నెహ్రూ సాంకేతిక విశ్వవిద్యాలయం (జేఎన్టీయూ) ఉపకులపతి సుదర్శన రావు సూచించారు. నషా ముక్త్ భారత్ అభియాన్‌లో భాగంగా నిర్వహించనున్న అవగాహన హెల్త్ వాక్‌కు సంబంధించిన గోడపత్రికలను బుధవారం జేఎన్టీయూ ప్రాంగణంలో ఆయన ఆవిష్కరించారు. ఈ సందర్భంగా ఉపకులపతి మాట్లాడుతూ.. ‘నషాముక్త్ యువ ఫర్ వికసిత్ భారత్–రాష్ట్రీయ సంకల్ప్ సమారోహ్’ కార్యక్రమంలో భాగంగా అక్టోబర్ 1న హెల్త్ వాక్ నిర్వహిస్తున్నట్లు తెలిపారు. యువత పెద్ద సంఖ్యలో పాల్గొని కార్యక్రమాన్ని విజయవంతం చేయాలని కోరారు. యువతలో మాదకద్రవ్యాల వినియోగం వల్ల కలిగే దుష్పరిణామాలపై అవగాహన కల్పించడం, వారిని వ్యసనాలకు దూరంగా ఉండేలా ప్రోత్సహించడం ఈ కార్యక్రమం ప్రధాన ఉద్దేశ్యమని పేర్కొన్నారు. ఆరోగ్యకరమైన జీవనశైలిని అలవర్చుకోవడంతో పాటు మాదకద్రవ్యాలకు దూరంగా ఉండాలని యువతకు సూచించారు. అక్టోబర్ 1న ఉదయం 6 గంటలకు అనంతపురం జేఎన్టీయూ మెయిన్ బిల్డింగ్ సమీపం నుంచి 3 కిలోమీటర్ల హెల్త్ వాక్ ప్రారంభమై ఓ.టి.పి.ఆర్.ఐ వరకు కొనసాగుతుందని తెలిపారు.