పింఛన్‌ భరోసా కల్పించడమే కూటమి ప్రభుత్వ లక్ష్యం

xPress24, Vizianagaram, October 1, గజపతినగరం: పేదలు, వృద్ధులు, వితంతువులు, దివ్యాంగులకు పింఛన్‌ భరోసా కల్పించడమే కూటమి ప్రభుత్వ లక్ష్యమని రాష్ట్ర ఎంఎస్‌ఎంఈ, సెర్ప్‌, ఎన్నారై వ్యవహారాల శాఖ మంత్రి కొండపల్లి శ్రీనివాస్‌ అన్నారు. గురువారం విజయనగరం జిల్లా గజపతినగరం నియోజకవర్గంలోని గజపతినగరం తానా వీధిలో నిర్వహించిన పింఛన్ల పంపిణీ కార్యక్రమంలో మంత్రి పాల్గొని లబ్ధిదారులకు పింఛన్లు అందజేశారు. ఈ సందర్భంగా మంత్రి మాట్లాడుతూ రాష్ట్రవ్యాప్తంగా అక్టోబర్‌ నెల పింఛన్ల పంపిణీ కోసం ప్రభుత్వం రూ.2,692.34 కోట్లను విడుదల చేసిందన్నారు. ఈ నెలలో మొత్తం 61.80 లక్షల మంది పింఛనుదారులకు ప్రయోజనం చేకూరనుందని తెలిపారు. పంపిణీ నిధుల్లో రూ.2,675.63 కోట్లను సంబంధిత స్వర్ణ గ్రామం, స్వర్ణ వార్డు పింఛన్‌ బ్యాంకు ఖాతాల్లో జమ చేయనున్నట్లు వివరించారు. కేంద్ర ప్రభుత్వ ఆదేశాల మేరకు ‘ఎస్‌ఎన్‌ఏ స్పర్ష్‌’ (SNA SPARSH) విధానం ద్వారా పింఛన్‌ మొత్తాన్ని నేరుగా లబ్ధిదారుల బ్యాంకు ఖాతాల్లో జమ చేసే డీబీటీ విధానాన్ని పైలట్‌ ప్రాతిపదికన గజపతినగరంలో ప్రారంభించినట్లు మంత్రి తెలిపారు. ఈ విధానం కింద గజపతినగరం మండలంలోని ఎన్‌ఎస్‌ఏపీ పింఛనుదారుల బ్యాంకు ఖాతాల్లో నేరుగా రూ.6 లక్షలు జమ కానున్నాయని చెప్పారు.