పుట్టపర్తిలో నామినేషన్ కేంద్రాలను తనిఖీ చేసిన జిల్లా కలెక్టర్

xPress24, Puttaparthi, October 16, పుట్టపర్తి: రాబోయే మున్సిపల్ ఎన్నికల నామినేషన్ల స్వీకరణ ప్రక్రియలో భాగంగా తొలిరోజు శుక్రవారం పుట్టపర్తి పట్టణంలోని ఎనుములపల్లి బీసీ హాస్టల్‌లో ఏర్పాటు చేసిన నామినేషన్ స్వీకరణ కేంద్రాలను జిల్లా కలెక్టర్, జిల్లా ఎన్నికల అధికారి ఎ. శ్యామ్ ప్రసాద్ స్వయంగా తనిఖీ చేశారు. అభ్యర్థుల నుంచి నామినేషన్లు స్వీకరించేందుకు ఏర్పాటు చేసిన అడ్మినిస్ట్రేటివ్ కౌంటర్లు, హెల్ప్‌డెస్క్‌లు, అభ్యర్థుల సౌకర్య కేంద్రాలను కలెక్టర్ క్షుణ్ణంగా పరిశీలించారు. ఎన్నికల సిబ్బంది నియామకం, అవసరమైన నామినేషన్ పత్రాల లభ్యత, రద్దీ నియంత్రణ, శాంతిభద్రతల పరిరక్షణకు చేపట్టిన ఏర్పాట్లను సమీక్షించారు. మున్సిపాలిటీ పరిధిలో నామినేషన్ల స్వీకరణ ప్రక్రియ సజావుగా, ప్రశాంత వాతావరణంలో ప్రారంభమైనట్లు తెలిపారు. ఎన్నికల నిబంధనలు కచ్చితంగా పాటించాలి రిటర్నింగ్ అధికారులు, ఎన్నికల సిబ్బంది ఎన్నికల సంఘం నిబంధనలను కచ్చితంగా పాటించాలని కలెక్టర్ ఆదేశించారు. నామినేషన్ పత్రాల పరిశీలన, స్వీకరణ ప్రక్రియలో ఎలాంటి పొరపాట్లకు తావులేకుండా పూర్తి పారదర్శకతతో విధులు నిర్వహించాలని స్పష్టం చేశారు. నామినేషన్లు దాఖలు చేసేందుకు వచ్చే అభ్యర్థులు, ప్రతిపాదకులకు ఎలాంటి అసౌకర్యం కలగకుండా అవసరమైన చర్యలు తీసుకోవాలని సూచించారు. మున్సిపల్ ఎన్నికల ప్రక్రియను స్వేచ్ఛాయుతంగా, నిష్పక్షపాతంగా, ప్రశాంతంగా, సమర్థవంతంగా నిర్వహించేందుకు జిల్లా ఎన్నికల యంత్రాంగం పూర్తిస్థాయిలో సన్నద్ధంగా ఉందని కలెక్టర్ పేర్కొన్నారు. ఈ తనిఖీలో పుట్టపర్తి ఆర్డీఓ సువర్ణతో పాటు మున్సిపల్ సిబ్బంది, సంబంధిత అధికారులు పాల్గొన్నారు.