పేదరిక నిర్మూలనే ప్రజా సేవలో 2.0 లక్ష్యం

xPress24, Srikakulam, October 1, కోటబొమ్మాళి: గ్రామాల్లో పేదరికాన్ని నిర్మూలించడమే ప్రధాన లక్ష్యంగా ముఖ్యమంత్రి నారా చంద్రబాబు నాయుడు అవిశ్రాంతంగా కృషి చేస్తున్నారని రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు అన్నారు. శ్రీకాకుళం జిల్లా కోటబొమ్మాళి మండలం దుప్పలపాడు గ్రామంలో గురువారం నిర్వహించిన ‘ప్రజా సేవలో 2.0’ కార్యక్రమంలో భాగంగా ఎన్టీఆర్ భరోసా పింఛన్ల పంపిణీ కార్యక్రమంలో మంత్రి పాల్గొన్నారు. ఇంటింటికీ వెళ్లి లబ్ధిదారులకు పింఛన్లు పంపిణీ చేశారు. ఈ సందర్భంగా కోటబొమ్మాళి మండలం గంగువాడలో రూ.47 లక్షల అంచనా వ్యయంతో నిర్మించిన ఐదు అంతర్గత సిమెంట్ రోడ్లను మంత్రి ప్రారంభించారు. దుప్పలపాడులో రూ.38.80 లక్షల అంచనా వ్యయంతో చేపట్టనున్న రక్షిత మంచినీటి పథకానికి శంకుస్థాపన చేశారు. అదే గ్రామంలో రూ.16 లక్షలతో నిర్మించిన అంతర్గత సిమెంట్ రోడ్లను ప్రారంభించారు. మంత్రి అచ్చెన్నాయుడు మాట్లాడుతూ కేవలం సంక్షేమ పథకాలు, పింఛన్లు అందించడమే కాకుండా ప్రతి ఒక్కరికీ సుస్థిరమైన జీవనోపాధి కల్పించడం ద్వారా కడు పేదరికాన్ని నిర్మూలించడంతో పాటు ఆర్థిక అసమానతలు లేని సమాజాన్ని నిర్మించడమే ‘ప్రజా సేవలో 2.0’ కార్యక్రమం ముఖ్య ఉద్దేశమని తెలిపారు. ప్రభుత్వంతో పాటు గ్రామాల్లో ఆర్థికంగా స్థిరపడిన వారు, వివిధ రంగాల్లో అభివృద్ధి చెందిన వ్యక్తులు కూడా ప్రజా సేవలో భాగస్వాములు కావాలని పిలుపునిచ్చారు. సమాజంలో ఆర్థికంగా బలంగా ఉన్న వారు ‘మార్గదర్శులు’గా ముందుకు వచ్చి కడు పేదరికంలో ఉన్న కుటుంబాలను ‘బంగారు కుటుంబాలు’గా దత్తత తీసుకుని వారికి అండగా నిలవాలని కోరారు.