పేదల వైద్యానికి సీఎం రిలీఫ్ ఫండ్ ద్వారా ఆర్థిక భరోసా

xPress24, Nellore, October 13, ఆత్మకూరు: పేదల ఆరోగ్య భద్రతకు సీఎం రిలీఫ్ ఫండ్ ద్వారా ఆర్థిక భరోసా కల్పిస్తున్నామని రాష్ట్ర దేవాదాయ శాఖ మంత్రి ఆనం రామనారాయణరెడ్డి అన్నారు. శ్రీ పొట్టి శ్రీరాములు నెల్లూరు జిల్లా ఆత్మకూరులో ఈరోజు 69 కుటుంబాలకు రూ.63.79 లక్షల విలువైన సీఎం రిలీఫ్ ఫండ్ చెక్కులను మంత్రి పంపిణీ చేశారు. ఈ సందర్భంగా మంత్రి ఆనం రామనారాయణరెడ్డి మాట్లాడుతూ.. ఆత్మకూరు నియోజకవర్గంలో గత రెండేళ్లలో 1,150 కుటుంబాలకు సీఎం రిలీఫ్ ఫండ్ ద్వారా రూ.10.42 కోట్లకు పైగా ఆర్థిక సహాయం అందించినట్లు తెలిపారు. ఆర్థిక ఇబ్బందుల కారణంగా ఏ కుటుంబమూ వైద్య సేవలకు దూరం కాకూడదనే లక్ష్యంతో ప్రభుత్వం పేదలకు అండగా నిలుస్తోందని పేర్కొన్నారు. పేద కుటుంబాలకు మెరుగైన వైద్య సేవలు అందించడంతో పాటు, అనారోగ్య సమయంలో ఆర్థిక ఇబ్బందులను తగ్గించేందుకు ప్రభుత్వం సీఎం రిలీఫ్ ఫండ్ ద్వారా సహాయం అందిస్తోందని మంత్రి తెలిపారు.