పదేళ్ల తర్వాత టీజీఎస్ ఆర్టీసీ గుర్తింపు సంఘం ఎన్నికల పోలింగ్ ప్రారంభం

xPress24, Hyderabad, October 9, తెలంగాణ రాష్ట్ర రోడ్డు రవాణా సంస్థ (TGSRTC)లో సుమారు దశాబ్ద కాలం విరామం అనంతరం గుర్తింపు కార్మిక సంఘం ఎన్నికల పోలింగ్ ఇవాళ ఉదయం 5 గంటలకు ప్రారంభమైంది. రాష్ట్రవ్యాప్తంగా ఉన్న 97 డిపోల పరిధిలో ఏర్పాటు చేసిన 200 పోలింగ్ కేంద్రాల్లో సాయంత్రం 6 గంటల వరకు ఓటింగ్ కొనసాగనుంది. మొత్తం 36,300 మంది ఆర్టీసీ కార్మికులు తమ ఓటు హక్కును వినియోగించుకోనున్నారు. ఎన్నికల నిర్వహణ కోసం అధికారులు గ్రేటర్‌ హైదరాబాద్‌ జోన్‌లో 32, హైదరాబాద్‌ జోన్‌లో 38, కరీంనగర్‌ జోన్‌లో 45 పోలింగ్ కేంద్రాలను పటిష్టమైన భద్రత మధ్య ఏర్పాటు చేశారు. ప్రధాన కూటముల మధ్య హోరాహోరీ పోరు.. రెండేసి ఓట్లు ఈ ఎన్నికల్లో బరిలో 12 యూనియన్లు ఉన్నప్పటికీ ప్రధానంగా కూటముల మధ్యే తీవ్ర పోటీ నెలకొంది. ఎంప్లాయీస్ యూనియన్, తెలంగాణ మజ్దూర్ యూనియన్ (TMU), నేషనల్ మజ్దూర్ యూనియన్ (NMU) ఒక కూటమిగా.. తెలంగాణ ఆర్టీసీ వర్కర్స్ యూనియన్ (TWU), స్టాఫ్ అండ్ వర్కర్స్ ఫెడరేషన్ (SWF) మరో కూటమిగా తలపడుతున్నాయి. ప్రతి కార్మికుడు రాష్ట్ర స్థాయి గుర్తింపు కోసం ఒకటి, ప్రాంతీయ (రీజియన్) స్థాయి గుర్తింపు కోసం మరొకటి చొప్పున రెండేసి ఓట్లు వేస్తున్నారు. గ్రేటర్‌ హైదరాబాద్‌ జోన్‌లో 13,797, కరీంనగర్‌ జోన్‌లో 11,392, హైదరాబాద్‌ జోన్‌లో 9,303 మంది ఓటర్లు ఉన్నారు. విధుల్లో ఉండే డ్రైవర్లు, కండక్టర్ల కోసం ఈ నెల 14, 15 తేదీల్లో పోస్టల్ బ్యాలెట్ విధానం కల్పించారు. ఈ నెల 17న ఓట్ల లెక్కింపు చేపట్టి తుది ఫలితాలను వెల్లడించనున్నారు.