పరిమితికి మించి ఎన్నికల ఖర్చు చేయరాదు

xPress24, Vijayawada, October 17, స్థానిక సంస్థల ఎన్నికల్లో పోటీ చేసే అభ్యర్ధులు ఆంధ్రప్రదేశ్ రాష్ట్ర ఎన్నికల సంఘం నిర్ణయించిన పరిమితికి మించి ఎన్నికల ఖర్చు చేయరాదని రాష్ట్ర ఎన్నికల కమిషనర్ అనిల్ చంద్ర పునేఠా పేర్కొన్నారు. విజయవాడలోని రాష్ట్ర ఎన్నికల సంఘం కార్యాలయంలో వ్యయ పరిశీలకులతో సమావేశాన్ని ఆయన నిన్న నిర్వహించారు. ఈ సందర్భంగా అనిల్ చంద్ర పునేఠా మాట్లాడుతూ.. పోటీ చేసే అభ్యర్థి నామినేషన్ వేసినప్పటి నుండి ఎన్నికల ప్రక్రియ ముగిసే వరకు రోజువారీ ఎన్నికల వ్యయాన్ని పరిశీలించేలా ఏర్పాటు చేసుకోవాలని సూచించారు. అంతేకాకుండా సదరు అభ్యర్థికి ఎన్నికల వ్యయాన్ని నమోదు చేయడానికి కావాల్సిన నిర్దిష్ట నమూనాలను ఉచితంగా నిర్ణీత సమయంలో రిటర్నింగు అధికారి అందజేసేలా చర్యలు తీసుకోవాలన్నారు. ఎన్నికల ఫలితాలు ప్రకటించిన 45 రోజుల లోపు పోటీ చేసిన ప్రతి అభ్యర్థి తన మొత్తం ఎన్నికల ఖర్చుల వివరాలను జిల్లా ఎన్నికల అధికారికి తప్పక సమర్పించాలని తెలిపారు.