పరిశుభ్రత ప్రతి ఒక్కరి బాధ్యత: జిల్లా కలెక్టర్ డాక్టర్ ఎం. ప్రభాకర్ రెడ్డి

xPress24, Paravathipuram, October 3, పార్వతీపురం మన్యం జిల్లా, అక్టోబర్ 3: పరిశుభ్రత ప్రతి ఒక్కరి బాధ్యత అని పార్వతీపురం మన్యం జిల్లా కలెక్టర్ డాక్టర్ ఎం. ప్రభాకర్ రెడ్డి అన్నారు. శనివారం గుమ్మలక్ష్మీపురం మండలం ఎల్విన్‌పేటలో స్వచ్ఛతా హీ సేవా కార్యక్రమంలో భాగంగా ఆయన పారిశుధ్య పనులను పరిశీలించారు. ఈ సందర్భంగా గ్రామంలో విస్తృతంగా పర్యటించిన కలెక్టర్ పరిసరాల పరిశుభ్రతను పరిశీలించి, పారిశుధ్య నిర్వహణపై సంబంధిత సిబ్బందికి పలు సూచనలు చేశారు. అనంతరం స్థానిక వాణిజ్య, వ్యాపార దుకాణాలను తనిఖీ చేసి, సింగిల్ యూజ్ ప్లాస్టిక్ వినియోగం వల్ల పర్యావరణానికి కలిగే నష్టాలను వ్యాపారులకు వివరించారు. ప్లాస్టిక్ వినియోగాన్ని పూర్తిగా నివారించి, పర్యావరణహితమైన గుడ్డ సంచులను ఉపయోగించేలా వినియోగదారులను ప్రోత్సహించాలని సూచించారు. తడి, పొడి చెత్తను వేర్వేరుగా సేకరించి పంచాయతీ సిబ్బందికి అందించాలని తెలిపారు. దుకాణాల ముందు పరిసరాలను పరిశుభ్రంగా ఉంచుకోవాలని, నిబంధనలు పాటించకుండా అపరిశుభ్రతకు కారణమైతే కఠిన చర్యలు తీసుకుంటామని హెచ్చరించారు. ప్రతి ఒక్కరూ పరిశుభ్రతను తమ దైనందిన జీవితంలో భాగంగా చేసుకోవాలని, పరిసరాలను శుభ్రంగా ఉంచుకుంటూ ఆరోగ్యకరమైన సమాజ నిర్మాణానికి సహకరించాలని కలెక్టర్ పిలుపునిచ్చారు.