భారత నౌకాదళంలోకి యుద్ధనౌక ‘మంగ్రోల్’.. అత్యాధునిక రక్షణ నౌక ముంబైలో ప్రారంభం

xPress24, mumbai, October 12, తీరప్రాంత జలాల్లో శత్రు జలాంతర్గాములను గుర్తించి ధ్వంసం చేసే లక్ష్యంతో రూపొందించిన మూడవ అత్యాధునిక యుద్ధనౌక 'మంగ్రోల్' ఇవాళ ముంబైలోని నావల్ డాక్‌యార్డ్‌లో భారత నౌకాదళంలో చేరింది. కొచ్చిలోని కొచ్చిన్ షిప్‌యార్డ్ లిమిటెడ్ (CSL) ఈ నౌకను నిర్మించింది. గుజరాత్‌లోని జునాగఢ్ జిల్లా తీరప్రాంత పట్టణమైన మంగ్రోల్ పేరును దీనికి పెట్టారు. 2004 వరకు సేవలందించిన పూర్వపు మైన్‌స్వీపర్ 'ఐఎన్ఎస్ మంగ్రోల్' వారసత్వాన్ని ఈ కొత్త నౌక ముందుకు తీసుకెళ్లనుంది. 80 శాతం స్వదేశీ పరిజ్ఞానం.. 'ఆత్మనిర్భర్ భారత్'కు నిదర్శనం కేంద్ర ప్రభుత్వ 'మేక్ ఇన్ ఇండియా', 'ఆత్మనిర్భర్ భారత్' పిలుపులో భాగంగా 80 శాతానికి పైగా స్వదేశీ పరిజ్ఞానంతో ఈ నౌకను తయారు చేశారు. యుద్ధనౌకల నిర్మాణం, ఆయుధాలు మరియు సెన్సార్ల అనుసంధానంలో దేశం సాధించిన స్వావలంబనకు ఇది నిదర్శనంగా నిలుస్తోంది. వాటర్‌జెట్ ప్రొపల్షన్, మూడు శక్తివంతమైన డీజిల్ ఇంజిన్ల ఆధారంగా పనిచేసే ఈ నౌక.. లోతు తక్కువగా ఉండే తీరప్రాంత జలాల్లో అత్యంత వేగంగా కదలగలదు. అధునాతన ఆయుధాలు, సెన్సార్లు తీరప్రాంత జలాల్లో నీటి అడుగున పొంచివున్న ముప్పులను ఎదుర్కొనేందుకు ఈ నౌకలో ఆధునిక వ్యవస్థలను ఏర్పాటు చేశారు. అభయ్ హల్-మౌంటెడ్ సోనార్ సిస్టమ్, స్వదేశీ జలాంతర్గామి వ్యతిరేక రాకెట్ లాంచర్లు. తేలికపాటి టార్పెడోలు,  'మారీచ్' అడ్వాన్స్‌డ్ టార్పెడో డెకాయ్ సిస్టమ్ వంటి అధునాతన వ్యవస్థలను ఏర్పాటు చేశారు. పెద్ద యుద్ధనౌకలు వెళ్లలేని తీరప్రాంతాల్లో గస్తీ విమానాలు, హెలికాప్టర్లతో సమన్వయం చేసుకుంటూ శత్రు జలాంతర్గాములను పసిగట్టేందుకు, దేశ నౌకాశ్రయాలు, తీరప్రాంత రక్షణను పటిష్టం చేసేందుకు ఈ నౌక ఎంతగానో ఉపయోగపడనుంది.