మేడారం సమ్మక్క-సారలమ్మ మినీ జాతర తేదీలు ఖరారు

xPress24, mulugu, September 28, ములుగు జిల్లాలోని ప్రసిద్ధ పుణ్యక్షేత్రం మేడారంలో సమ్మక్క-సారలమ్మల మినీ జాతర తేదీలు ఖరారయ్యాయి. వచ్చే ఏడాది ఫిబ్రవరిలో ఈ మినీ జాతరను నిర్వహించనున్నట్లు మేడారం పూజారుల సంఘం అధికారికంగా ప్రకటించింది. జాతర నిర్వహణకు సంబంధించిన వివరాలను లేఖ ద్వారా రాష్ట్ర పంచాయతీరాజ్, స్త్రీ శిశు సంక్షేమ శాఖ మంత్రికి పూజారులు తెలియజేశారు.  ఫిబ్రవరి 17న జాతర అధికారికంగా ప్రారంభం కానుంది. 18న అమ్మవార్లకు ప్రత్యేక పూజలు నిర్వహించనున్నారు. 19న భక్తుల దర్శనాలు, మొక్కుల చెల్లింపులు జరుగుతాయి. ఫిబ్రవరి 20న ముగింపు ఉత్సవాలతో మినీ జాతర పూర్తికానుంది. ప్రతి రెండేళ్లకు ఒకసారి జరిగే మహా జాతర మధ్యలో వచ్చే సంవత్సరంలో మినీ జాతర నిర్వహించడం ఆనవాయితీగా కొనసాగుతోంది. ఈసారి కూడా అదే సంప్రదాయాన్ని అనుసరిస్తూ మినీ జాతరను నిర్వహించనున్నారు.