మోడల్ కోడ్ ఆఫ్ కండక్ట్‌ను కఠినంగా అమలు చేస్తాం: జిల్లా కలెక్టర్ డా. సిరి

xPress24, Kurnool, October 15, కర్నూలు, అక్టోబర్ 14: కర్నూలు జిల్లాలో స్థానిక సంస్థల ఎన్నికలను నిష్పక్షపాతంగా, పారదర్శకంగా, న్యాయబద్ధంగా నిర్వహించేందుకు అన్ని ఏర్పాట్లు చేస్తున్నట్లు జిల్లా కలెక్టర్ డా. సిరి తెలిపారు. ఎన్నికల షెడ్యూల్‌ ప్రకటించిన వెంటనే మోడల్ కోడ్ ఆఫ్ కండక్ట్ (ఎంసీసీ) అమల్లోకి వచ్చిందని పేర్కొన్నారు. రాజకీయ పార్టీలు, అభ్యర్థులు, ప్రభుత్వ ఉద్యోగులు ఎన్నికల నియమావళిని కచ్చితంగా పాటించాలని ఆమె సూచించారు. ఎన్నికల షెడ్యూల్ ప్రకారం నామినేషన్ల స్వీకరణ అక్టోబర్ 18 వరకు కొనసాగుతుంది. అక్టోబర్ 19న నామినేషన్ల పరిశీలన, అక్టోబర్ 21న అభ్యర్థుల ఉపసంహరణ ప్రక్రియ నిర్వహిస్తారు. అక్టోబర్ 28న ఉదయం 7 గంటల నుంచి సాయంత్రం 5 గంటల వరకు పోలింగ్ జరుగుతుంది. అవసరమైతే అక్టోబర్ 29న రీపోలింగ్ నిర్వహిస్తారు. అక్టోబర్ 30న ఉదయం 8 గంటలకు ఓట్ల లెక్కింపు ప్రారంభమవుతుంది. ఎన్నికల సమయంలో మతం, కులం పేరుతో విద్వేషాలు, ఉద్రిక్తతలు రెచ్చగొట్టే వ్యాఖ్యలు చేయరాదని కలెక్టర్ హెచ్చరించారు. ఎన్నికల ప్రచార కార్యక్రమాలకు ముందస్తు అనుమతులు తీసుకోవాలని సూచించారు. అభ్యర్థులు ఎన్నికల వ్యయ పరిమితులను తప్పనిసరిగా పాటించాలని స్పష్టం చేశారు. ఓటర్లకు ఇబ్బందులు కలగకుండా పోలింగ్ కేంద్రాల్లో తాగునీరు, మరుగుదొడ్లు, వీల్‌చైర్లు తదితర ప్రాథమిక సదుపాయాలు కల్పించనున్నట్లు తెలిపారు. మోడల్ కోడ్ ఆఫ్ కండక్ట్ ఉల్లంఘనలకు సంబంధించి ఫిర్యాదులను 18004254299 నంబర్‌కు ఫోన్ చేసి నమోదు చేయవచ్చని కలెక్టర్ తెలిపారు. జిల్లాలో ఎన్నికలు ప్రశాంతంగా, నిష్పక్షపాతంగా, పారదర్శకంగా జరిగేందుకు రాజకీయ పార్టీలు, అభ్యర్థులు, ప్రజలు అధికారులకు సహకరించాలని జిల్లా కలెక్టర్ డా. సిరి విజ్ఞప్తి చేశారు.