మోదీ నాయకత్వాన్ని అభినందిస్తూ కేంద్ర కేబినెట్ ప్రత్యేక తీర్మానం

xPress24, Hyderabad, October 6, గుజరాత్ ముఖ్యమంత్రిగా, దేశ ప్రధానమంత్రిగా 25 ఏళ్ల పాటు సుదీర్ఘ సేవలు అందించిన ప్రధాని నరేంద్ర మోదీ నాయకత్వాన్ని అభినందిస్తూ కేంద్ర కేబినెట్ ప్రత్యేక తీర్మానాన్ని ఆమోదించింది. 'దేశమే ప్రథమం, పౌరుడే ప్రథమం' అనే నినాదంతో సాగిన ఆయన ప్రస్థానం, సాధించిన చారిత్రాత్మక విజయాలు, చేపట్టిన సంస్కరణలను ఈ తీర్మానంలో కొనియాడారు. గుజరాత్‌లో ప్రారంభించిన 'స్వాగత్' ప్రజా ఫిర్యాదుల పరిష్కార వేదిక జాతీయ స్థాయిలో 'ప్రగతి'గా రూపాంతరం చెందడం, జ్యోతిగ్రామ్ పథకం దేశవ్యాప్తంగా విస్తరించడం మోదీ అభివృద్ధి దృక్పథానికి నిదర్శనమని కేబినెట్ పేర్కొంది. 60 కోట్ల జన్ ధన్ ఖాతాలు, 4 కోట్లకు పైగా గృహాల నిర్మాణం, 25 కోట్ల మందిని పేదరికం నుంచి విముక్తి చేయడం, 3.5 కోట్ల మంది లఖ్‌పతి దీదీలను తయారు చేయడం వంటి సంక్షేమ కార్యక్రమాల ద్వారా పేదల జీవితాల్లో వెలుగులు నింపారని ప్రశంసించింది. జీఎస్‌టీ అమలు, పాత చట్టాల రద్దు, మూలధన వ్యయాన్ని 12 లక్షల కోట్లకు పెంచడం, సెమీకండక్టర్ల తయారీ, స్వదేశీ రక్షణ ఉత్పత్తులు, యూపీఐ డిజిటల్ చెల్లింపులు, చంద్రయాన్-3 విజయం వంటివి మోదీ 'ఆత్మనిర్భర్ భారత్' విజన్‌కు నిదర్శనమని పేర్కొంది. 2016 సర్జికల్ స్ట్రైక్స్, 2019 బాలాకోట్ ఎయిర్ స్ట్రైక్స్, 2025 ఆపరేషన్ సిందూర్, ఆర్టికల్ 370 రద్దుతో జాతీయ భద్రతను ప్రధాని మోదీ మరింత బలోపేతం చేశారని వివరించింది. 2047 నాటికి 'వికసిత్ భారత్' సాధనే లక్ష్యంగా ప్రధాని నాయకత్వంలో దేశం ముందుకు సాగుతోందని కేంద్ర మంత్రివర్గం కొనియాడింది.