మూలా నక్షత్రం సందర్భంగా నూజివీడు సరస్వతీ అమ్మవారి ఆలయానికి పోటెత్తిన భక్తులు

xPress24, Nuzividu, October 16, ఏలూరు జిల్లా | అక్టోబర్ 16, 2026 ఏలూరు జిల్లా నూజివీడు పట్టణంలోని శ్రీ సరస్వతీ అమ్మవారి ఆలయం భక్తజన సందోహంతో ఆధ్యాత్మిక శోభను సంతరించుకుంది. దక్షిణాదిలో రెండో బాసరగా పేరుగాంచిన ఈ ఆలయంలో శుక్రవారం మూలా నక్షత్రాన్ని పురస్కరించుకుని ప్రత్యేక పూజా కార్యక్రమాలు నిర్వహించారు. తెల్లవారుజామున 3.30 గంటల నుంచే అమ్మవారికి అభిషేకాలు, ప్రత్యేక పూజలు ప్రారంభమయ్యాయి. తెల్లవారుజాము నుంచే భక్తులు, విద్యార్థినీ విద్యార్థులు పెద్ద సంఖ్యలో ఆలయానికి తరలివచ్చి అమ్మవారిని దర్శించుకున్నారు. ఈ సందర్భంగా ఆలయ ప్రాంగణంలో వేద పండితుల ఆధ్వర్యంలో వేలాది మంది చిన్నారులకు అక్షరాభ్యాస కార్యక్రమాలు నిర్వహించారు. తమ పిల్లలకు విద్యాబుద్ధులు సిద్ధించాలని, అమ్మవారి ఆశీస్సులు లభించాలని తల్లిదండ్రులు ప్రత్యేక పూజలు నిర్వహించారు. అమ్మవారి నామస్మరణలు, భక్తుల సందడి, చిన్నారుల అక్షరాభ్యాస కార్యక్రమాలతో ఆలయ ప్రాంగణం భక్తిపారవశ్యంతో మార్మోగింది. భక్తుల రాకతో నూజివీడులోని శ్రీ సరస్వతీ అమ్మవారి ఆలయం ఆధ్యాత్మిక వైభవంతో కళకళలాడింది.