యూఎల్‌సీ పెండింగ్ దరఖాస్తులు వెంటనే క్రమబద్ధీకరణ, వేలాది మందికి ఊరట: మంత్రి పొంగులేటి

xPress24, Hyderabad, September 28, తెలంగాణలో దశాబ్దాలుగా పెండింగ్‌లో ఉన్న అర్బన్ ల్యాండ్ సీలింగ్ (యూఎల్‌సీ) దరఖాస్తులను సమగ్రంగా పరిశీలించి వెంటనే క్రమబద్ధీకరించాలని రెవెన్యూ శాఖను రాష్ట్ర ప్రభుత్వం ఆదేశించింది. ఈ నిర్ణయం ద్వారా వేలాది మంది పట్టణ పేద, మధ్యతరగతి వర్గాలకు భారీ ఊరట లభించనుందని రెవెన్యూ శాఖ మంత్రి పొంగులేటి శ్రీనివాస్‌రెడ్డి వెల్లడించారు. నిబంధనలకు లోబడి అర్హత ఉన్న ప్రతి కేసుకు క్రమబద్ధీకరణ ఉత్తర్వులు ఇస్తామని మంత్రి స్పష్టం చేశారు. అలాగే సెక్షన్ 22-ఏ భూముల సమస్యల పరిష్కారానికి జీవో 118, జీవో 76లకు అనుగుణంగా స్పష్టమైన మార్గదర్శకాలు జారీ చేసినట్లు తెలిపారు. దీని ద్వారా సరైన అనుమతులు కలిగిన ఇళ్లు, ప్లాట్లు, అపార్ట్‌మెంట్ ఫ్లాట్ల క్రయవిక్రయాలు, రిజిస్ట్రేషన్లకు ఉన్న అడ్డంకులను పూర్తిగా తొలగిస్తున్నట్లు మంత్రి వివరించారు. రాష్ట్రంలో మిగిలి ఉన్న భూ వివాదాలను ఫాస్ట్‌ట్రాక్ పద్ధతిలో పరిష్కరించి ప్రజలకు యాజమాన్య హక్కులు కల్పిస్తామని ఆయన హామీ ఇచ్చారు.