యాసంగిలో పశుగ్రాస కొరత నివారణకు ముందస్తు చర్యలు: తుమ్మల

xPress24, Hyderabad, October 14, రానున్న యాసంగిలో వరి సాగు విస్తీర్ణం తగ్గే అవకాశం ఉందని రాష్ట్ర వ్యవసాయ శాఖ మంత్రి తుమ్మల నాగేశ్వరరావు తెలిపారు. ఈ నేపథ్యంలో పశుగ్రాసం కొరత తలెత్తకుండా ముందస్తు చర్యలు తీసుకోవాలని అధికారులను ఆదేశించారు. పంట వ్యర్థాలను కాల్చకుండా పశుగ్రాసంగా వినియోగించేలా చూడాలని, అవసరమైతే ఖరీఫ్ పశుగ్రాసాన్ని కొనుగోలు చేయాలని స్పష్టం చేశారు. పశుగ్రాసం అందుబాటులో ఉండేలా జిల్లా కలెక్టర్లు తగిన చర్యలు తీసుకోవాలని సూచించారు. బుధవారం హైదరాబాద్‌లో ఎల్ నినో ప్రభావాన్ని ఎదుర్కొనేందుకు అధికారులతో మంత్రి తుమ్మల సమీక్ష నిర్వహించారు. డిజిటల్ వ్యవసాయం, ఏఐ టెక్నాలజీకి ప్రాధాన్యం డిజిటల్ వ్యవసాయంలో ఏఐ, శాటిలైట్ సాంకేతికతకు ప్రాధాన్యం ఇస్తున్నట్లు మంత్రి వెల్లడించారు. జర్మనీ ప్రతినిధులతో డిజిటల్ సాంకేతికతపై చర్చలు జరిపినట్లు చెప్పారు. శాటిలైట్ డేటాతో నేలలోని పోషకాల లభ్యతను అంచనా వేసి, ఒకేసారి 70 లక్షల మంది రైతులకు మట్టి పోషకాలపై సమాచారం అందించే యోచనలో ప్రభుత్వం ఉందన్నారు. ప్రతి 12 రోజులకు ఎరువుల వినియోగంపై సమగ్ర సమాచారం అందించే అవకాశం ఉందని, అధిక ఎరువులు, పురుగుమందుల వాడకాన్ని తగ్గించాలని రైతులకు సూచించారు. సాగు ఖర్చుల తగ్గింపునకు చర్యలు కొత్త సాంకేతికతల కచ్చితత్వాన్ని పరిశీలించేందుకు వ్యవసాయ విశ్వవిద్యాలయ శాస్త్రవేత్తలతో సమన్వయం చేసుకోవాలని మంత్రి సూచించారు. నేల ఆరోగ్య పరిరక్షణ, సాగు ఖర్చుల తగ్గింపునకు డిజిటల్ వ్యవసాయం ఎంతో ఉపయోగకరమని పేర్కొన్నారు. ఈ సమీక్షా సమావేశంలో ఆయిల్‌పామ్ సాగు విస్తరణ, యాంత్రీకరణ, గోదాముల నిర్మాణాలపై చర్చించారు.