రికార్డు స్థాయిలో జీఎస్టీ వసూళ్లు... సెప్టెంబర్‌లో రూ.2.03 లక్షల కోట్లు

xPress24, Delhi, October 1, దేశ ఆర్థిక వ్యవస్థ బలోపేతానికి అద్దం పడుతూ జీఎస్టీ వసూళ్లు గణనీయమైన వృద్ధిని కనబరుస్తున్నాయి. సెప్టెంబర్‌ నెలలో మొత్తం జీఎస్టీ వసూళ్లు రూ.2.03 లక్షల కోట్లను దాటాయని కేంద్ర ఆర్థిక శాఖ అధికారికంగా ప్రకటించింది. గతేడాది ఇదే నెలతో పోలిస్తే ఇది 14.7 శాతం అధికం. దేశీయ లావాదేవీల ద్వారా వచ్చే పన్ను వసూళ్లు 10.1 శాతం పెరిగి రూ.1.38 లక్షల కోట్లకు చేరగా, దిగుమతుల ద్వారా వచ్చే స్థూల ఆదాయం 26 శాతం వృద్ధితో రూ.65,525 కోట్లుగా నమోదైంది. ఏడాది ప్రాతిపదికన రీఫండ్‌లు 3 శాతం తగ్గి రూ.27,001 కోట్లకు చేరగా, రీఫండ్‌ల తర్వాత నికర జీఎస్టీ వసూళ్లు 18.1 శాతం పెరిగి రూ.1.76 లక్షల కోట్లుగా నిలిచాయి. ఇక ఈ ఆర్థిక సంవత్సరం తొలి అర్ధభాగంలో (ఏప్రిల్ - సెప్టెంబర్) మొత్తం జీఎస్టీ వసూళ్లు 11.6 శాతం వృద్ధితో రూ.12.46 లక్షల కోట్లకు చేరుకున్నాయి. తెలంగాణలో దూసుకెళ్తున్న జీఎస్టీ వసూళ్లు జాతీయ సగటు వృద్ధి రేటును వెనక్కి నెట్టి తెలంగాణ రాష్ట్రంలో జీఎస్టీ వసూళ్లు అద్భుతమైన ప్రదర్శన కనబరుస్తున్నాయి. సెప్టెంబర్‌లో ఏకంగా 18 శాతం వృద్ధితో రూ.5,327 కోట్ల జీఎస్టీ రెవెన్యూ నమోదైంది. ఏప్రిల్ నుంచి సెప్టెంబర్ మధ్య సర్దుబాటు తర్వాత ఎస్‌జీఎస్‌టీ రూపంలో రూ.22,231 కోట్లు వసూలయ్యాయి. మరోవైపు ఆంధ్రప్రదేశ్‌లోనూ జీఎస్టీ వసూళ్లు స్థిరమైన వృద్ధిని కనబరుస్తున్నాయి. సెప్టెంబర్ నెలలో 6 శాతం వృద్ధితో రూ.3,599 కోట్లు రాగా, ప్రథమార్థంలో సెటిల్‌మెంట్‌ తర్వాత 18 శాతం వృద్ధితో రూ.19,598 కోట్ల వసూళ్లను సాధించింది.