రైతు బజార్లలో తక్కువ ధరకే నాణ్యమైన బియ్యం విక్రయాలు ప్రారంభం

xPress24, Nellore, October 9, నెల్లూరు జిల్లా: శ్రీ పొట్టి శ్రీరాములు నెల్లూరు జిల్లాలో ప్రజలకు సరసమైన ధరలకు నాణ్యమైన బియ్యాన్ని అందించేందుకు ఆంధ్రప్రదేశ్ రాష్ట్ర పౌర సరఫరాల సంస్థ ఆధ్వర్యంలో రైతు బజార్లలో బియ్యం విక్రయాలను ప్రారంభించినట్లు జాయింట్ కలెక్టర్ మొగిలి వెంకటేశ్వర్లు తెలిపారు. నెల్లూరు నగరంలోని ఫతేఖాన్‌పేట రైతు బజారులో ఏర్పాటు చేసిన బియ్యం విక్రయ కేంద్రాన్ని ఆయన ప్రారంభించారు. ఈ సందర్భంగా జాయింట్ కలెక్టర్ మాట్లాడుతూ, ప్రస్తుతం మార్కెట్‌లో సన్న బియ్యం కిలో ధర రూ.72 నుంచి రూ.75 వరకు ఉందని తెలిపారు. పేద, సామాన్య ప్రజల అవసరాలను దృష్టిలో ఉంచుకుని రాష్ట్ర ప్రభుత్వం రైతు బజార్ల ద్వారా నాణ్యమైన బియ్యాన్ని తక్కువ ధరలకు అందుబాటులోకి తీసుకువస్తోందని పేర్కొన్నారు. ప్రజలు ఈ అవకాశాన్ని సద్వినియోగం చేసుకుని, రైతు బజార్లలో అందుబాటులో ఉన్న బియ్యాన్ని కొనుగోలు చేయాలని జాయింట్ కలెక్టర్ కోరారు.