రైతుల పంట కొనుగోళ్లకు నిధులు విడుదల

xPress24, Amaravati, October 12, అమరావతి, అక్టోబర్ 12: రైతుల నుంచి పంట ఉత్పత్తుల కొనుగోళ్ల కోసం కేంద్ర ప్రభుత్వం రూ.1,944.43 కోట్ల నిధులను విడుదల చేసిందని రాష్ట్ర వ్యవసాయ శాఖ మంత్రి కె. అచ్చెన్నాయుడు వెల్లడించారు. ఈ మేరకు ఆయన ఒక ప్రకటన విడుదల చేశారు. 2024–25 ఖరీఫ్‌ సీజన్‌ నుంచి 2025–26 రబీ సీజన్‌ వరకు 2.84 లక్షల మెట్రిక్‌ టన్నులకు పైగా పంట ఉత్పత్తులను కొనుగోలు చేసినట్లు తెలిపారు. కందులు, శనగలు, మినుములు, పెసలతో పాటు ఇతర పంటలను కొనుగోలు చేయడం ద్వారా రైతులకు కనీస మద్దతు ధర కల్పించేందుకు చర్యలు తీసుకున్నట్లు పేర్కొన్నారు. ఖరీఫ్‌–2026 సీజన్‌కు సంబంధించి పంట ఉత్పత్తుల కొనుగోళ్లకు కేంద్ర ప్రభుత్వ ఆమోదం రావాల్సి ఉందని మంత్రి అచ్చెన్నాయుడు వెల్లడించారు.