రైల్వే ఉద్యోగులకు దీపావళి కానుక...

xPress24, Delhi, October 14, దసరా, దీపావళి పండుగల వేళ కేంద్ర ప్రభుత్వం రైల్వే ఉద్యోగులకు తీపి కబురు అందించింది. ఉద్యోగులకు బోనస్ చెల్లించేందుకు కేంద్ర క్యాబినెట్ ఆమోదం తెలిపింది. 78 రోజుల వేతనాన్ని 'ఉత్పాదకతతో ముడిపడిన బోనస్' రూపంలో చెల్లించేందుకు మంత్రివర్గం పచ్చజెండా ఊపింది. ఈ నిర్ణయంతో దాదాపు 11.40 లక్షల మంది నాన్-గెజిటెడ్ రైల్వే ఉద్యోగులకు లబ్ధి చేకూరనుంది. ఈ చెల్లింపుల కోసం ప్రభుత్వం అవసరమైన నిధులను కేటాయించింది. రైల్వే పనితీరును మరింత మెరుగుపరిచేలా సిబ్బందిని ప్రోత్సహించడానికి ఈ నిర్ణయం తోడ్పడుతుందని రైల్వే మంత్రిత్వ శాఖ తెలిపింది. గరిష్ఠంగా రూ. 17,951 లబ్ధి బోనస్ చెల్లింపులపై ఉన్న పరిమితి కారణంతో ఒక్కో ఉద్యోగికి గరిష్ఠంగా రూ.17,951 వరకు లభించనుంది. ట్రాక్ మైంటెనర్స్, లోకో పైలట్లు, ట్రైన్ మేనేజర్లు, స్టేషన్ మాస్టర్లు, సూపర్‌వైజర్లు, టెక్నీషియన్లు, పాయింట్స్‌మన్లతో పాటు ఇతర గ్రూప్-సి సిబ్బందికి ఈ ప్రయోజనం వర్తిస్తుంది. ఉద్యోగుల శ్రమకు తగిన గుర్తింపు లభించనుండటంతో సిబ్బంది హర్షం వ్యక్తం చేస్తున్నారు. పెరిగిన సరుకు, ప్రయాణికుల రవాణా 2025-26 ఆర్థిక సంవత్సరంలో భారతీయ రైల్వే విశేష పురోగతి సాధించింది. ఈ కాలంలో రైల్వే శాఖ 1670 మిలియన్ టన్నుల కార్గో రవాణా చేపట్టగా, దాదాపు 741 కోట్ల మంది ప్రయాణికులను సురక్షితంగా గమ్యస్థానాలకు చేర్చింది. ఉత్తమ సేవలు అందించిన సిబ్బందికి ప్రోత్సాహకంగా ఈ బోనస్ చెల్లిస్తున్నట్లు అధికారులు వెల్లడించారు.