రాష్ట్రపతి భవన్‌లో స్విట్జర్లాండ్ అధ్యక్షుడు గై పర్మెలిన్‌కు ఘన స్వాగతం

xPress24, Delhi, October 5, మూడు రోజుల అధికారిక పర్యటన నిమిత్తం భారత్‌కు విచ్చేసిన స్విట్జర్లాండ్ అధ్యక్షుడు గై పర్మెలిన్‌కు రాష్ట్రపతి భవన్ ప్రాంగణంలో అధికారికంగా ఘన స్వాగతం లభించింది. రాష్ట్రపతి ద్రౌపదీ ముర్ము, ప్రధానమంత్రి నరేంద్ర మోదీ ఆయనకు ఆత్మీయ స్వాగతం పలికారు. ప్రధాని మోదీ ఆహ్వానం మేరకు గై పర్మెలిన్ ఉన్నత స్థాయి అధికారుల బృందం,  వ్యాపారవేత్తలతో కలిసి సోమవారం న్యూఢిల్లీ చేరుకున్నారు. ఈ పర్యటనలో భాగంగా వర్తకం, పెట్టుబడులు, సైన్స్, సాంకేతికత, ఆవిష్కరణలు సాంస్కృతిక రంగాలలో ద్వైపాక్షిక సంబంధాలను మరింత బలోపేతం చేసుకోవడంపై ఇరు దేశాల నాయకులు ప్రధానంగా దృష్టి సారించనున్నారు. పర్యటనలో భాగంగా ప్రధాని నరేంద్ర మోదీ, స్విస్ అధ్యక్షుడు గై పర్మెలిన్ మధ్య ఉన్నత స్థాయి ద్వైపాక్షిక చర్చలు జరగనున్నాయి. అలాగే ప్రాంతీయ, అంతర్జాతీయ అంశాలపై కూడా ఇరు నేతలు అభిప్రాయాలను పంచుకోనున్నారు. అక్టోబర్ 7న జరగనున్న రెండవ 'ఇండియా-ఈఎఫ్‌టీఏ  ప్రోస్పరిటీ సమ్మిట్'లో కూడా పర్మెలిన్ పాల్గొంటారు. యూరోపియన్ ఫ్రీ ట్రేడ్ అసోసియేషన్  దేశాల్లో స్విట్జర్లాండ్ భారత్‌కు అత్యంత కీలకమైన వర్తక, పెట్టుబడి భాగస్వామిగా ఉందని విదేశాంగ మంత్రిత్వ శాఖ తెలిపింది. ఈ పర్యటన ఇరు దేశాల మధ్య ఉన్న సుదీర్ఘ మైత్రిని మరింత ముందుకు తీసుకెళ్తుందని అధికారులు వెల్లడించారు.