రష్యన్ సైన్యంలో చేరిక.. భారతీయ పౌరులకు విదేశాంగ శాఖ హెచ్చరిక

xPress24, Delhi, October 1, స్వల్పకాలిక ఆర్థిక లాభాల ఆశతో రష్యన్ సాయుధ బలగాల్లో చేరేందుకు కొందరు భారతీయులు తమ భారతీయ పౌరసత్వాన్ని స్వచ్ఛందంగా వదులుకోవడం పట్ల కేంద్ర విదేశాంగ శాఖ (MEA) తీవ్ర దిగ్భ్రాంతి వ్యక్తం చేసింది. రష్యా పాస్‌పోర్టులు పొంది ఆ దేశ సైనిక బలగాల్లో చేరుతున్న వారిపై ప్రత్యేక దృష్టి సారించినట్లు విదేశాంగ శాఖ ప్రతినిధి రణ్‌ధీర్ జైస్వాల్ ఎక్స్ వేదికగా వెల్లడించారు. సోషల్ మీడియా లేదా అనుమానాస్పద ఏజెంట్ల ద్వారా వచ్చే నకిలీ విదేశీ ఉద్యోగ ప్రకటనలను నమ్మి మోసపోవద్దని గత రెండేళ్లుగా ప్రభుత్వాలు పదే పదే హెచ్చరిస్తున్నప్పటికీ, కొందరు అప్రమత్తంగా వ్యవహరించకపోవడం గమనార్హం. తీవ్ర ప్రాణాపాయం, దౌత్యపరమైన చిక్కులు రష్యన్ సైన్యంలో చేరిన తర్వాత ఏవైనా ఇబ్బందులు తలెత్తితే భారత ప్రభుత్వం దౌత్య మార్గాల ద్వారా సులభంగా విడిపించవచ్చనే అపోహలో చాలా మంది ఉంటున్నారని, ఇది పూర్తిగా పొరబాటని విదేశాంగ శాఖ స్పష్టం చేసింది. సైనిక ఒప్పందాలపై సంతకం చేసి క్షేత్రస్థాయి యుద్ధ రంగంలోకి వెళ్లిన తర్వాత వారిని వెనక్కి రప్పించడం అత్యంత క్లిష్టమైన ప్రక్రియ అని హెచ్చరించింది. ఇది ప్రాణాలకే ముప్పు తెచ్చే అత్యంత ప్రమాదకరమైన మార్గమని తేల్చిచెప్పింది. ప్రైవేట్ ఏజెంట్లు, అధికారిక గుర్తింపు లేని సంస్థలు ఆకర్షణీయమైన వేతనాల పేరుతో విదేశీయులను సైనిక పోరాటాల్లోకి ఆకర్షిస్తున్నాయని పేర్కొంది. తప్పనిసరిగా తనిఖీ చేసుకోవాలి విదేశాల్లో ఉద్యోగాల కోసం వెళ్లేవారు సంబంధిత ఏజెన్సీలకు విదేశాంగ శాఖ వద్ద అధికారిక రిజిస్ట్రేషన్ ఉందో లేదో ముందే సరిచూసుకోవాలని సూచించింది. కాగా, రష్యన్ సైన్యంలో చిక్కుకుపోయిన భారతీయులందరి భద్రత, శ్రేయస్సును దృష్టిలో ఉంచుకుని వారిని త్వరగా విడుదల చేయించేందుకు రష్యా ప్రభుత్వంతో భారత దౌత్య వర్గాలు నిరంతరం చర్చిస్తున్నాయని విదేశాంగ శాఖ వెల్లడించింది.