విజయనగరం ఉత్సవాల నిర్వహణకు ఏర్పాట్లు వేగవంతం చేయాలి

xPress24, Vizianagaram, October 3, విజయనగరం, అక్టోబరు 3: విజయనగరం ఉత్సవాలు–2026ను అత్యంత వైభవంగా, ప్రజలందరూ మెచ్చేలా విజయవంతంగా నిర్వహించేందుకు అవసరమైన అన్ని ఏర్పాట్లను వేగవంతం చేయాలని జిల్లా జాయింట్ కలెక్టర్ సేధు మాధవన్ సంబంధిత అధికారులను ఆదేశించారు. ఉత్సవాల నిర్వహణకు చేపట్టాల్సిన ఏర్పాట్లపై కలెక్టరేట్ సమావేశ మందిరంలో అధికారులతో నిర్వహించిన సమీక్షా సమావేశంలో ఆయన మాట్లాడారు. ఉత్సవాల నిర్వహణకు సంబంధించి అన్ని శాఖల అధికారులు పరస్పర సమన్వయంతో పనిచేయాలని, నిర్దేశించిన గడువులోగా పనులన్నింటినీ పూర్తి చేయాలని సూచించారు. ఉత్సవాల నిర్వహణకు అవసరమైన ఆర్థిక ప్రణాళికలను సిద్ధం చేయడంతోపాటు, టెండర్ల ప్రక్రియను తక్షణమే ప్రారంభించాలని ఆదేశించారు. వారం రోజుల్లోగా టెండర్ల ప్రక్రియను పూర్తి చేసి, పనులను ప్రారంభించాలని స్పష్టం చేశారు. ఉత్సవాలు ప్రారంభమయ్యేలోగా అన్ని ఏర్పాట్లతోపాటు మౌలిక సదుపాయాల కల్పన పనులను కూడా పూర్తి చేయాలని జాయింట్ కలెక్టర్ సూచించారు. ఇందుకోసం సంబంధిత శాఖల అధికారులు ప్రత్యేక కార్యాచరణ ప్రణాళికను రూపొందించుకుని, పనుల పురోగతిని ఎప్పటికప్పుడు సమీక్షించాలని ఆదేశించారు.