విజయవాడలో రాష్ట్రపతి ద్రౌపది ముర్ము పర్యటన

xPress24, Vijayawada, October 13, విజయవాడ, అక్టోబర్ 13: భారత రాష్ట్రపతి ద్రౌపది ముర్ము ఈ నెల 14, 15 తేదీల్లో రెండు రోజుల పాటు విజయవాడలో పర్యటించనున్నారు. ఈ నెల 14వ తేదీ సాయంత్రం గన్నవరం విమానాశ్రయానికి చేరుకోనున్న రాష్ట్రపతి, అనంతరం ఇంద్రకీలాద్రిపై కొలువైన శ్రీ కనకదుర్గమ్మను దర్శించుకోనున్నారు. 15వ తేదీ ఉదయం పున్నమి ఘాట్‌లో నిర్వహించనున్న జాతీయ సరస్‌ మేళా–2026ను రాష్ట్రపతి లాంఛనంగా ప్రారంభించనున్నారు. అనంతరం స్వయం సహాయక సంఘాల సభ్యులు, లఖ్‌పతి దీదీలతో కలిసి విందులో పాల్గొంటారు. కార్యక్రమాలు ముగిసిన తర్వాత మధ్యాహ్నం గన్నవరం విమానాశ్రయం నుంచి ఢిల్లీకి తిరుగు ప్రయాణం కానున్నారు. రాష్ట్రపతి పర్యటన నేపథ్యంలో విజయవాడలోని సంబంధిత శాఖల అధికారులు సమన్వయంతో భద్రతా ఏర్పాట్లు చేపడుతున్నారు. పర్యటన సజావుగా జరిగేలా అవసరమైన అన్ని చర్యలు తీసుకుంటున్నట్లు అధికారులు తెలిపారు.