విద్యుత్ సంక్షోభానికి ప్రభుత్వ అసమర్థతే కారణం: హరీశ్‌రావు

xPress24, Hyderabad, October 15, తప్పు చేసి అధికారులపై నెపం నెట్టడం ముఖ్యమంత్రి రేవంత్ రెడ్డి, మంత్రులకు పరిపాటిగా మారిందని మాజీ మంత్రి హరీశ్‌రావు విమర్శించారు. ముఖ్యమంత్రి చేసిన వ్యాఖ్యలపై సామాజిక మాధ్యమం ఎక్స్ వేదికగా ఆయన స్పందించారు. రాష్ట్రంలో నెలకొన్న కరెంట్ కోతలకు, విద్యుత్ సంక్షోభానికి ప్రభుత్వ అసమర్థత, ప్రణాళికారాహిత్యమే ప్రధాన కారణమని తెలిపారు. కనీసం బొగ్గు నిల్వలు కూడా సమకూర్చుకోకుండా, ముందస్తు సమీక్షలు నిర్వహించకుండా విద్యుత్ రంగాన్ని గాలికి వదిలేశారని ఆరోపించారు. గత 9 నెలలుగా ఎల్‌నినో ప్రభావం గురించి వాతావరణ శాఖ, శాస్త్రవేత్తలు నిరంతరం హెచ్చరిస్తున్నప్పటికీ ప్రస్తుత ప్రభుత్వం ఏమాత్రం పట్టించుకోలేదని హరీశ్‌రావు పేర్కొన్నారు. ముందస్తు చర్యలు చేపట్టడంలో విఫలమై, ప్రస్తుతం తమ లోపాలను కప్పిపుచ్చుకోవడానికి అధికారులను సస్పెండ్ చేస్తామని బెదిరింపులకు దిగడం సరైన విధానం కాదని హితవు పలికారు.