వందేళ్లు పూర్తి చేసుకున్న యూనియన్ పబ్లిక్ సర్వీస్ కమిషన్

xPress24, Delhi, October 1, భారతదేశంలో తొలి పబ్లిక్ సర్వీస్ కమిషన్ 1926 అక్టోబర్ 1న ఏర్పాటైంది. ఆరంభంలో పరిమిత అధికారాలు కలిగిన సలహా సంఘంగా రూపుదిద్దుకున్న ఈ సంస్థ, రాజ్యాంగ అమలు తర్వాత స్వతంత్ర రాజ్యాంగబద్ధ సంస్థగా అవతరించింది. బ్రిటీష్ కాలంలో కేవలం లండన్‌లోనే నిర్వహించిన సివిల్స్ పరీక్షలను, స్వాతంత్ర్య పోరాట యోధుల డిమాండ్లతో భారత్‌లోనే నిర్వహించడం ప్రారంభించారు. మెట్కాఫ్ హౌస్ కేంద్రంగా ప్రస్థానం ప్రారంభించిన ఈ సంస్థ, నాటి నుంచి నేటి వరకు దేశ పాలనా రథచక్రాన్ని నడిపించడంలో కీలక పాత్ర పోషిస్తోంది. పరీక్షా విధానంలో విప్లవాత్మక మార్పులు కాలక్రమేణా మారుతున్న అవసరాలకు అనుగుణంగా యూపీఎస్సీ తన పరీక్షా విధానంలో అనేక మార్పులు తెచ్చింది. 1979లో కోఠారి కమిటీ సిఫారసుల మేరకు ప్రిలిమినరీ, మెయిన్స్, ఇంటర్వ్యూలతో కూడిన త్రిసభ్య పరీక్షా విధానాన్ని ప్రవేశపెట్టారు. ఆ తర్వాత ఆప్టిట్యూడ్ టెస్ట్, ఎథిక్స్ పేపర్ వంటి నూతన విధానాలను అమల్లోకి తెచ్చారు. అభ్యర్థుల సౌలభ్యం కోసం ఆన్‌లైన్ దరఖాస్తు విధానం, డిజిటల్ పోర్టల్స్ ఏర్పాటు చేసి ప్రక్రియను మరింత పారదర్శకంగా మార్చారు. ప్రస్తుత డిజిటల్ యుగంలో ఏఐ ఆధారిత ఫేస్ ఆథెంటికేషన్ విధానాన్ని విజయవంతంగా అమలు చేస్తోంది. పెరుగుతున్న మహిళలు, అట్టడుగు వర్గాల ప్రాతినిధ్యం గతంతో పోలిస్తే సివిల్స్ పరీక్షల్లో మహిళలు, అట్టడుగు వర్గాల ప్రాతినిధ్యం గణనీయంగా పెరిగింది. మహిళా అభ్యర్థులు అగ్రశ్రేణిలో నిలుస్తూ సత్తా చాటుతున్నారు. దివ్యాంగులకు ప్రత్యేక రాయితీలు, సబ్జెక్టుల ఎంపికలో వెసులుబాటు కల్పిస్తూ అందరికీ సమాన అవకాశాలు అందిస్తోంది. ఎంపిక కాని ప్రతిభావంతులైన అభ్యర్థుల వివరాలను ప్రైవేట్, ప్రభుత్వ రంగ సంస్థలకు అనుసంధానించేందుకు ప్రతిభా సేతు వంటి వినూత్న వేదికలను కూడా అందుబాటులోకి తెచ్చింది.