విదేశాలకు తెలంగాణ సన్నబియ్యం ఎగుమతి: స్టీఫెన్‌ రవీంద్ర

xPress24, Hyderabad, October 12, తెలంగాణ రాష్ట్రం నుంచి విదేశాలకు కూడా సన్నబియ్యం ఎగుమతులు చేయనున్నట్లు పౌరసరఫరాల శాఖ కమిషనర్‌ ఎం. స్టీఫెన్‌ రవీంద్ర వెల్లడించారు. ఫిలిప్పీన్స్‌లోని మనీలాలో జరుగుతున్న 'ఇంటర్నేషనల్‌ రైస్‌ కాన్ఫరెన్స్‌- 2026'లో ప్రపంచ వ్యవసాయ రంగ ప్రముఖులను ఉద్దేశించి ఆయన ప్రసంగించారు. ఈ సందర్భంగా వ్యవసాయ రంగంలో తెలంగాణ సాధించిన విప్లవాత్మక పురోగతిని, నాణ్యమైన ధాన్యం దిగుబడులను అంతర్జాతీయ వేదికపై ఆయన విపులంగా వివరించారు. రాష్ట్రంలో నాణ్యమైన సన్నబియ్యం ఉత్పత్తి గణనీయంగా పెరుగుతుండటంతో గ్లోబల్ మార్కెట్‌లో వీటికి మంచి డిమాండ్ ఉందన్నారు. ఈ నేపథ్యంలో అంతర్జాతీయ బియ్యం కొనుగోలుదారులు, వ్యాపార సంస్థలు తెలంగాణతో నేరుగా భాగస్వామ్యం కావాలని ఆయన పిలుపునిచ్చారు. ఈ భాగస్వామ్యాల ద్వారా రాష్ట్ర రైతులకు, వ్యాపారులకు అంతర్జాతీయ స్థాయిలో మెరుగైన అవకాశాలు లభిస్తాయని ఆయన స్పష్టం చేశారు.